SUNDAY 24 FEBRUARY 2019

Archivos por Etiqueta: Xunta

Profesionais do dereito e da saúde mental constatan os prexuízos que causan as políticas da Xunta para os dereitos das migrantes e os doentes mentais

  • Rosa Cerqueiro e Miguel Vieito participaron na comisión alternativa de Sanidade impulsada pola oposición parlamentaria
  • Vieito falou sobre a exclusión das persoas migrantes do sistema sanitario galego e Cerqueiro explicou o abandono por parte da Xunta da atención á saúde mental

A sala de En Marea no Parlamento de Galicia acolleu unha nova sesión da comisión alternativa de Sanidade impulsada polas tres forzas da oposición parlamentaria. Os comparecentes neste ocasión foron o investigador e especialista en dereito da exclusión Miguel Vieito e a psicóloga clínica do SERGAS, Rosa Cerquido. Os dous concluíron, cada quen desde o seu campo de especialidade, que as políticas da Xunta de Galicia provocan serios prexuízos en materia de falta de atención sanitaria.  No caso dos doentes de enfermidades mentais polo abandono dos programas especializados en este tipo de doenzas e no caso das persoas migrantes coa exclusión dos dereitos a seren atendidos polo sistema sanitario galego. A deputada de En Marea e vicepresidenta do Parlamento, Eva Solla, explicou na súa quenda de intervención nesta comisión que están “constatados os prexuízos das políticas sanitarias do PP e que tanto na atención mental como nos dereitos das migrantes foron reiteradamente denunciados no Parlamento de Galicia”.

Rosa Cerquido é psicóloga clínica do Servizo Galego de Saúde e integrante do Movemento Galego da Saúde Mental. A comparecente na comisión alternativa de Sanidade explicou cal era a situación da atención mental en Galicia, unha atención que cualificou como “un panorama sombrío e que temos a obriga de reverter”. Cerquido resumiu na súa intervención a situación da atención á saúde mental en Galicia explicando que en “situacións de crise ecómica aumentan o número de doenzas mentais e, polo tanto, faise máis necesaria esta atención, o que sucedeu en Galicia é que se abandonou a saúde mental xusto no momento en que era máis necesaria”.

Cerquido explicou tamén na súa intervención que a atención en Galicia ten un problema de “accesibilidade” aludindo a un estudo encargado pola propia Consellería de Sanidade que afirma que un de cada cinco galegos/galegas presentou durante a súa vida un transtorno de tipo mental, pero estas cifras contrastan coas que explican que só unha de cada tres persoas con doenzas chegan a contactar cos servizos sanitarios”. Engadiu que case a “metade con transtornos graves e tres de cada catro con transtornos moderanos non acudiron a atención primaria nin a especializada”. Iso revela un problema de acceso dos doentes aos servizos de atención no sistema sanitario galego. Pero aínda tendo en conta esta situación, en xuño de 2018, máis de 8.000 persoas esperaban por unha primeira cita no servizo de psquiatría, segundo as cifras da Consellería de Sanidade.

Sinalou que tanto Galicia como Asturias son as comunidades con maior “prevalencia nos casos de depresión e de ansiedade”. No mesmo sentido, explicou a especialista que estas dúas comunidades son as que rexistraban maior número de mortes por suicidio. Neste panorama, Rosa Cerqueiro explicou que en Galicia se rexistrou un “aumento importante dos problemas de saúde mental que requiren de atención especializada, aumento moi preocupante de mortes por suicidio, un aumento excepcional do consumo de psicofármacos, dificultades para acceder aos servizos de saúde mental e dificultades obter tratamentos psicolóxicos, tanto na infancia, na adolescencia como nos adultos”.

Segundo Cerqueiro, as implicacións máis graves derivadas da política actual da Xunta en saúde mental son tres fundamentalmente. “A decisión de reducir as políticas de protección social e sanitaria nun contexto de crise económica levou a un aumento da desigualdade social, o empobrecemento e a exclusión social”. Unha segunda implicación é que a precariedade asistencial en persoal, recursos e organización dos servizos levan a un risco aumentado de perda da calidade dos coidados e da seguridade das persoas atendidas”. En terceiro lugar, segundo sinalou Cerqueiro “estamos expostas a unha violentación inaceptable de dereitos fundamentais”. Cerqueiro sinalou tamén que todos estes datos aínda eran máis graves se se analizaban con perspetiva de xénero, onde unha vez máis, as mulleres estaban máis afectadas por estas carencias.

EXCLUSIÓN DE PERSOAS MIGRANTES DO SISTEMA SANITARIO GALEGO

A comparecencia de Miguel Vieito centrouse no exclusión do sistema sanitario galego das persoas migrantes. O investigador e especialista en dereitos da exclusión sinalou que as políticas do PP neste caso “foron eleccións deliberadas para deixar sen atención a migrantes e favorecendo a facturación dos servizos sobre os dereitos a atención das persoas”.

Vieito apuntou na comisión alternativa de Sanidade no Parlamento de Galicia, que desde o decreto do goberno central de 2012, o que se produciu foi “unha exclusión legal das persoas migrantes, un cambio legal baseado en argumentos falaces que a estatísticas desminten”. Entre eses argumentos falaces utilizados polo PP está o aforro económico, a sustentabilidade, a loita contra o turismo sanitario. Vieito explicou que os datos din exactamente o contrario: “as persoas migrantes fan menos uso da sanidade porque son novas e sanas”. Sinalou tamén que nos últimos anos houbo un retroceso nos dereitos sociais que supuxo unha regresión de case 30 anos e que, na práctica, deixou sen atención a 873.000 persoas”.

Ademais de explicar como afectou o decreto de 2012, Vieito sinalou cal foi a actitude que adoptou a Xunta de Galicia ante a situación xerada: “complicou todos os trámites e o acceso das persoas migrantes ao sistema de saúde, chegando a facer unha obscena deixación de funcións cando delegan este acceso aos servizos sociais como se non fosen un asunto sanitario”.

Miguel Vieito citou na súa comparecencia un informe de Médicos del Mundo no que se informaba de 107 casos de exclusión na atención sanitaria. Vieito sinalou que a Xunta de Galicia puido ter tomado decisións que atemperaran os prexuízos do decreto de 2012, pero fixo o contrario “e tomou deliberadamente a decisión de excluír aos migrantes do dereito á atención universal”. Segundo o avogado “a Xunta favoreceu o criterio económico por riba do cumprir os dereitos ata o punto de que os migrantes que recibían antes a factura do servizo que o diagnóstico do que lles pasaba”.

Vieito engadiu que desde a entrada en vigor do decreto16/2012 “a mortalidade na poboación migrante incrementouse nun 15%, o que supón 70 mortes a maiores no Estado por culpa da posta en marcha dunha norma que exclúe as persoas migrantes”. Sinalou o avogado que todas cifras aumentaban de maneira considerable se se utilizaban parámetros de xénero para estudalas.

O BNG apoia o rescate de Alcoa e propón un pleno extraordinario coa comparencia de Feixóo

  • Pontón critica que permaneza mudo cando hai 400 empregos en xogo e insta a dar unha resposta masiva na manifestación deste domingo
  • Reunión co grupo provincial do Bloque na Deputación da Coruña e co comité de empresa, co que comparte “indignación” coa Xunta e o Estado

A portavoz nacional, Ana Pontón, avanzou que o BNG vai pedir a celebración dun pleno extraordinario a vindeira semana coa comparecencia do presidente da Xunta, despois de que as últimas reunións celebradas en Madrid coa multinacional non fixeran máis que confirmar a intención da empresa de pechar a súa planta na Coruña.

“Se hai algunha cuestión que merece un pleno extraordinario é garantir 400 postos de traballo na Coruña, o Goberno debe estar á altura das circunstancias aínda que sexa no tempo de desconto xa que non o fixo até agora e, como país, temos que reaccionar”, indicou Pontón tras censurar o mutismo de Feixóo. “Debe saír do seu silencio e poñerse á fronte para buscar unha solución”, recalcou.

A líder do Bloque fixo esta proposta tras a reunión mantida na Deputación co grupo provincial do BNG, coa vicepresidenta Goretti Sanmartín á cabeza, e co comité de empresa de ALCOA para abordar a situación a menos dunha semana de que a multinacional aplique o ERE extintivo.

Neste sentido, Pontón declarou compartir a “indignación” dos e das traballadoras por  como se está levando un proceso “que nin sequera podemos considerar unha negociación porque ALCOA mantén o peche da fábrica cunha proposta enganosa que pretende facernos pasar por parvos aos galegos e as galegas e que ademais significa unha navallada polas costas á cidade da Coruña e ao conxunto do país”, denunciou.

A día de hoxe, non hai ningunha proposta encima da mesa que garanta o futuro de ALCOA e, por iso, demanda á Xunta e  ao Ministerio “traballar para darlle a volta a esa situación”. Pontón salientou a importancia de dar unha contundente resposta social como país na manifestación prevista para o vindeiro domingo na cidade herculina, e instou a unha participación masiva.

“É importante que sintan nesa manifestación que hai un país detrás, que non tira a toalla e que reclama o seu dereito a producir. Son importantes as declaracións pero hai que  cumprir esas declaracións e se todos dicimos que ALCOA ten futuro, Goberno central e galego teñen que implicarse para ver como se converten en realidade, en lugar de servir de coartada para abaratar o despedimento e o desmantelamento da fábrica na Coruña a unha multinacional”, alegou Pontón.

A formación nacionalista aposta pola intervención inmediata da factoría e por unha tarifa específica para industrias electrointensivas.

“O BNG dixo desde o primeiro momento que a fábrica da Coruña ten futuro con o sen a multinacional, polo tanto, a Administración ten que asumir a xestión de ALCOA é buscar un comprador que garanta a continuidade da empresa e do emprego”, explicou a portavoz nacionalista. “Non nos temos que resignarnos a pasar de ser produtores a importadores de aluminio”, indicou Pontón, “nin ao disparate de que nun país exportador de enerxía vexa en risco 400 postos de traballo polos custes enerxéticos”, concluíu.

No encontro celebrado na Deputación tamén participou o candidato a Alcaldía, Francisco Jorquera, a portavoz municipal en Arteixo, Silvia Seixas, e o deputado pola Coruña, Xosé Luís Rivas.

O Parlamento aproba por unanimidade a iniciativa de En Marea para establecer unha política retributiva máis transparente dos cargos públicos

O Parlamento de Galicia aprobou por unanimidade a proposición de Lei presentada pola vicevoceira de En Marea, Carmen Santos, na que se insta á Xunta a realizar un estudo no que se analice o actual esquema retributivo dos responsables públicos galegos e realizar unha proposta que amose un compromiso real para establecer unha política retributiva máis transparente e coherente co fin de reducir o gasto total en soldos públicos.

Na súa intervención, Carmen Santos defendeu que a crise económica e as súas nefastas consecuencias foi sentida como unha estafa por grande parte da cidadanía e que veu xerada por diferentes motivos. “Uns dos máis relevantes, que ocasionou grande indignación a milleiros de cidadáns e cidadás, é que mentres os executivos no goberno aplicaban duros recortes sociais e laborais ao conxunto da cidadanía rebaixando as súas condicións de vida, este modus operandi aplicado sen compaixón á maioría social non era equivalente na súa aplicación aos altos cargos e directivos en todos os eidos, nin eran equivalentes na súa aplicación para tender á redución do gasto público, aos salarios e privilexios de innumerables cargos políticos e cargos públicos” declarou Santos.

Tal e como explicou a vicevoceira de En Marea, “certos partidos e executivos, intentan xustificar e defender estas políticas para non aplicar novas formas de limitación salarial con carácter exemplificante, ademais de para reducir o gasto público, dicindo que non se arranxa nada con estas medidas, que non se poden ter políticos low cost, que non supón un aforro orzamentario significativo ou que son medidas populistas”. Pese a isto. lembrou como Alberto Núñez Feijóo baseou a súa campaña electoral do 2009 na denuncia do despilfarro en supostos coches de luxo e en soldos de conselleiros e
de cargos de “chiringuitos” do bipartito. “Unha agresiva campaña que tivo impacto nos medios e coa que conseguiu chegar á Presidencia da Xunta” afirmou. Nove anos despois, e xa afianzado como presidente con tres gobernos consecutivos de maioría absoluta, aquelas denuncias de despilfarro parece que non existiron, e o Partido Popular de Galicia acusa a quen denuncia estas prácticas de maneira reiterada de “populistas”.

Así, como subliñou Carmen Santos a día de hoxe o presidente galego defende os soldos astronómicos para cargos e entidades que moitos cidadás e cidadáns poden percibir como chiringuitos, como é o caso do Suplusa, da Deputación de Lugo. “Para o goberno da Xunta e o seu presidente, a crise rematou ou non, según a súa conveniencia política, ou de intereses que nada teñen que ver cos dos cidadáns que ten que gobernar” lamentou. “Feijóo apoiou que o seu partido aprobara para o ex socialista, e deputado non adscrito en Lugo, Manuel Martínez, un salario superior aos 71.000 euros, case o mesmo que cobra el mesmo como Presidente da Xunta, que cobra 72.000 euros de salario on argumentos esperpénticos, unha decisión na que deron marcha atrás a semana pasada despois de que En Marea incluíse no pleno esta iniciativa” destacou Carmen Santos.

“O que observamos son escusas para colocar a unha clientela política e pagala cos cartos de todos e todas. Este tipo de prácticas, que agochan accións escurantistas e clientelares, teñen o noso total rexeitamento porque ademais de non ser éticas, e en certos casos dubidosamente legais, son infames xa que se sufragan cos cartos de todos e de todas” asegurou Carmen Santos.

A vicevoceira de En Marea no Parlamento incidiu no rexeitamento radical do seu grupo contra este modelo de goberno e por este motivo presentou esta iniciativa no Parlamento que finalmente logrou o apoio unánime de toda a Cámara galega.

En Marea pide a devolución os orzamentos da Xunta para 2019 por “decepcionantes, restritivos, mediocres antisociais, continuístas e neoliberais”

O grupo parlamentario de En Marea presentou unha emenda á totalidade e solicitou á devolución do proxecto de orzamentos xerais para o exercicio 2019 da Xunta de Galicia. O voceiro Luís Villares arrancou a súa intervención lamentando que o conselleiro de Facenda, Valeriano Martínez, evitase no seu discurso palabras como precariedade ou desigualdade pese a estar a falar duns orzamentos que para En Marea supoñen afondar na desesperanza de todas esas persoas que non chegan a fin de mes. Villares lamentou tamén que o proceso orzamentairo non comenzase, como debería, cun debate político sobre as necesidades reais  e cuantificar canto custa satisfacer eses dereitos vulnerados. Así mesmo, denunciou o veto inicial sufrido por En Marea ante o rexeitamento da emenda presentada polo grupo para que se puidese debater sobre que quere á cidadanía facer con parte do diñeiro que o PP dedica ao pago da débeda, se “devolver cartos aos bancos ou destinalos a investimentos sociais”. “É necesario poñer ás persoas por enriba dos intereses dos bancos e de Angela Merkel. E non podemos facelo” afirmou o voceiro de En Marea.

Luís Villares continuou a súa intervención xustificando o rexeitamento do pola falla de adaptación á realidade da economía galega que salientou, ao igual que a do conxunto do estado e a propia Unión Europea, iniciou unha fase alcista do ciclo a partires de 2014. Pese a ter xa un PIB por riba do nivel previo a recesión, tanto en termos reais como sobre todo nominais e despois dunha década perdida como consecuencia da política neoliberal de recortes do gasto e devaluación salarial con efectos moi negativos sobre a vida das persoas. Máis riqueza pero menos gasto público, máis riqueza pero menos recursos destinados a financiar a sanidade, o ensino, a protección social, política de emprego ou o investimento.

Os orzamentos de 2019 en ningún caso se poden cualificar de expansivos xa que o gasto non financeiro medra o 3,8 por cento en comparación con 2018 e polo tanto medra por debaixo de crecemento nominal do PIB previsto para 2019. “É un incremento decepciónante e moi insuficiente para recuperarnos dos recortes da fase aguda da austeridade” afirmou Luís Villares. “O proxecto de orzamentos para 2019 que presenta o goberno significa renunciar a recuperarnos dos recortes e dar continuidade ao proceso de redución do publico na prestación de servizos e na economía” explicou.

Para o grupo de En Marea supón unha evolución inaceptable porque desta forma os recortes se consolidan nos orzamentos. As cifras concretas permiten cuantificar o devalo do recursos públicos: en 2019 a Xunta disporá de 363 millóns de euros mais que en 2018 pero 2.500 millóns menos que en 2009 en termos reais.

O gasto en sanidade é inferior en 549,4 millóns de euros ao de 2009, unha redución equivalente ao 13 por cento en termos reais. En educación o retroceso é de 413,5 millóns de euros o que supón un recorte do 15 por cento sobre 2009. Unha caída aínda maior en infraestruturas porque perden o 48 por cento do seu importe en 2009, deixándose de investir 331,8 millóns de euros.

Unha cifra similar tamén nas políticas de emprego, porque a pesares de ser o principal problema para a cidadanía a Xunta vai gastar 221,4 millóns menos que en 2009, un retroceso do 46 por cento en termos reais nos recursos para combater ao desemprego e a precariedade laboral. A política de vivendapracticamente desaparece en termos orzamentarios porque a Xunta recorta o gasto no 66 por cento en 2019 en comparación con 2009, unha caída de 159 millóns de euros que deixa a función 45 en apenas 83 millóns de euros o próximo ano.

A realidade que se agocha detrás do discurso propagandístico da lexislatura do rural demostra a dinamización económica do rural perde 151,9 millóns de euros, un retroceso do 32 por cento. Un deterioro das políticas cara o rural que vese agravada polo retroceso da función 55, de actuacións e valoración do medio rural, que perde 64 millóns de euros en termos reais sobre a cifra de 2009. O mesmo sucede no sector primario, porque os recursos destinados a política pesqueira caen en case 100 millóns de euros, un retroceso do 49 por cento en termos reais en comparación co 2009.

Os recursos destinados a industria, enerxía e minaría caen o 26 por cento, o desenvolvemento empresarial o 31 por cento, as políticas de apoio o comercio o 61 por cento e o orzamento de turismo en 2009 vai ser o 32 por cento menor que en 2009 en termos reais. Retrocesos que tamén afectan gravemente a outros eidos non directamente económicos, como o que sofre a cultura que perde o 56 por cento dos seus recursos, equivalente a un recorte de 90,8 millóns de euros en termos reais dende 2009 e a normalización lingüísticaque sofre un recorte brutal de 16,9 millóns de euros, equivalente ao 68 por cento do orzamento de 2009 en termos reais.

E o mesmo lle sucede ao territorio, porque a función 54 de actuacións medioambientais perde o 65 por cento dos recursos que tiña en 2009, un recorte de 220,5 millóns de euros ao que hai que engadir os 43 millóns de euros que se deixan de investir na función 52 de ordenación do territorio, que perde o 73 por cento dos recursos de 2009 en termos reais.

EVOLUCION DOS INGRESOS INACEPTABLE

Un recorte do gasto que ten a súa orixe nunha evolución dos ingresos inaceptable como valorou o voceiro de En Marea, porque crecen por debaixo do PIB nominal o que impide recuperar o nivel de recursos dispoñibles previo a recesión a pesares de que o PIB nominal xa é superior. As razóns desta negativa evolución son varias, dende o mal funcionamento do sistema de finanzamento das CC.AA. ata o inaceptable devalo do FCI e outras transferencias de capital, cun papel determinante da política fiscal aplicada tanto polo goberno central como pola Xunta de Galicia.

“A política fiscal neoliberal do PP provocou a desfiscalización das rendas de capital, dos beneficios empresariais e dos grandes patrimonios” subliñou Villares. Así, esta deserción fiscal dos ricos reduciu os ingresos públicos pero tamén desequilibrou o reparto da carga fiscal, de forma que a maioría social paga dúas veces porque soporta unha maior carga fiscal e porque reciben peores servizos públicos e unha protección social deteriorada.

No orzamento de 2019 a propaganda da rebaixa de impostos segue ocupando un lugar central. Dando por bos os datos do orzamento, en 2019 os beneficios fiscais chegan ata 430 millóns de euros, cifra á cal hai que sumar os 1.900 millóns acumulados dende 2012 a 2018, para acadar un total de 2.330 millóns de euros.

A política fiscal que se ten aplicado e que se sigue presente no orzamento de 2019 ten un profundo sesgo ideolóxico conservador, porque reducir impostos sempre beneficia aos máis ricos e recortar gasto público sempre prexudica aos máis débiles. O orzamento de 2019 é un claro exemplo desta política fiscal para ricos, porque a medida fundamental é rebaixar o Imposto de Patrimonio, isto é, a tributación das persoas que teñen un patrimonio superior a 700.000 euros.

NOVOS PRÉSTAMOS PARAP PAGAR OS PRÉSTAMOS QUE VENCEN

O voceiro referiuse tamén á nova débeda que vai emitir o ano que vén a Xunta por un importe de 1.768 millóns de euros para pagar 1.530 millóns de euros que vencen ese ano. “Esta é a realidade, pedir novos préstamos para pagar os préstamos que vencen” denunciou. Empregando os datos do orzamento, a función 91, a débeda pública, vai ter unha dotación de 1.675 millóns de euros, equivalente ao 14,5 por cento do orzamento total, isto é, agora destinamos cinco veces máis recursos ao servizo da débeda. En 2018 debemos 7.500 millóns de euros mais que en 2008, isto é, a débeda por persoa aumentou en 2.864 euros na ultima década.

MENOS EMPREGO E MÁIS PRECARIO

O voceiro de En Marea referiuse tamén á situación laboral, xa que temos o mesmo nivel de riqueza pero menos emprego, máis precariedade laboral e peores salarios. En Galicia hai 120.000 empregos menos que antes da recesión e 60.000 menos que en 2009 cando empezaron a gobernar. Menos emprego e de peor calidade porque a metade da clase traballadora xa é precaria. Hai 153.000 persoas desempregadas, 67.000 máis que antes da recesión, e moitas de longa duración. Hai mais de 53.000 fogares con todos os membros en paro, e dentro deles 32.000 que non teñen ningún ingreso laboral, nin salario, nin pensión nin prestación por desemprego.

Os salarios baixaron de media un 8 por cento, pero os máis precarios perderon neste tempo o 25 por cento do seu poder adquisitivo. Arredor de 450.000 persoas asalariadas teñen ingresos por debaixo de 900 euros. Un de cada tres asalariados galegos está en pobreza laboral, pobreza que afecta tamén aos autónomos porque o 55 por cento declara ingresos por debaixo de 500 euros ao mes. O 44 por cento dos fogares galegos ingresa menos de 1.500 euros ao mes sumando os ingresos de tódolos seus membros.
Hai 612.000 persoas en risco de pobreza ou exclusión social, temos unha taxa Arope do 23 por cento que implica que unha de cada catro persoas do noso país está nesa situación. O 63  por cento das pensións están por debaixo do limiar da pobreza, pensionistas pobres que no caso das pensións de viuvez chega ata o 81 por cento.

“Temos o mesmo PIB que antes da recesión pero está moito peor distribuído, por iso temos unha sociedade máis inxusta, máis desigual, con máis pobreza, con menos dereitos laborais, menos emprego, máis paro, salarios devaluados e maior precariedade laboral que antes de caer no pozo da dobre recesión” denunciou o voceiro de En Marea.

“O proxecto de orzamentos para 2019 que presenta a Xunta non serven para dar resposta a esta situación e por iso avaliámolos como decepcionantes, restritivos, mediocres, antisociais, continuístas e neoliberais, non serven para mellorar a vida da cidadanía, para empezar a darlle a volta aos recortes, nin para impulsar a actividade económica e recuperar o emprego” concluíu Luís Villares.

UNHA ALTERNATIVA BASEADA NUN MODELO DE CRECEMENTO INCLUSIVO

Fronte este modelo neoliberal, En Marea propón avanzar por una vía diferente, baseada nun modelo de crecemento inclusivo, que non deixe a ninguén á marxe, e po lo tanto máis xusto e sólido, apostando pola mellora da actividade en sectores de máis valor engadido, en especial cun peso importante das ramas industriais, recuperando o traballo estable e con dereitos como a norma e non a excepción, con salarios decentes sobre os que se poida soster o estado do benestar grazas aos impostos e as cotizacións.

Unha proposta baseada no impulso da demanda interna como factor de crecemento e da produtividade como a vía sostible a medio e longo prazo da competitividade exterior do noso país. Para iso, presenta unha alternativa para incrementar o orzamento en 400 millóns de euros, mellorando os ingresos coa finalidade de financiar unha política económica que impulse o crecemento.

La entrada En Marea pide a devolución os orzamentos da Xunta para 2019 por “decepcionantes, restritivos, mediocres antisociais, continuístas e neoliberais” aparece primero en Contrainformación.

O vicevoceiro de En Marea acude ao TSXG ante a continua vulneración dos seus dereitos como deputado por parte da Xunta de Galicia

O vicevoceiro de En Marea, Antón Sánchez, ven de presentar un recurso contencioso administrativo ante o Tribunal Superior de Xustiza de Galicia para a protección dos seus dereitos coma deputado do Parlamento de Galicia ante a reiterada negativa por parte da Xunta de Galicia de entregar a documentación solicitada sobre o proceso de fusión das caixas galegas. O pasado 20 de setembro, Sánchez rexistrou por última vez un escrito dirixido á presidencia da Cámara galega na que se pedía acceder a documentos e informes sobre a fusión. Non era a primeira vez. Desde 2013 –xa como deputado de Alternativa Galega de Esquerda na anterior lexislatura- Antón Sánchez ten solicitado esta información sen obter nin a documentación requirida nin resposta algunha por parte da Xunta de Galicia pese a estar obrigada.

Os documentos solicitados son en primeiro lugar a carta de encargo da auditora KPMG que en teoría avalaba a fusión das caixas segundo Núñez Feijóo e Marta Fernández Currás, e onde o Goberno galego reflexaba as cuestións a auditar, información fundamental para valorar a responsabilidade da Xunta de Galicia. “Este documento desapareceu misteriosamente e non sabemos porque non se quere entregar” denunciou o vicevoceiro de En Marea.

O outro documento pedido foron os informes dos técnicos da consellería de Facenda incluídos no expediente de fusión. Tampouco nada se sabe deles.

“Estamos ante unha situación gravísima xa que se está ocultando a verdade non aos deputados e deputadas senón á cidadanía dun negocio que rematou coa venda das caixas galegas a prezo de saldo ao señor Escotet e que agora está a obter beneficios millonarios” remarcou Antón Sánchez que explicou que “ante a ocultación e mordaza da Xunta vémonos obrigados a recorrer á Xustiza pese a ser unha obriga da Xunta ofrecer esta información aos deputados e deputadas”.

A intención de ocultar e obstruír por parte tanto do Goberno galego como do Partido Popular queda de manifesto así mesmo na xestión da comisión de investigación das caixas de debería xa estar rematada, cun informe e unhas conclusións e “o PP continua a xogar cos tempos tratando de dilatar os tempos e evitar que as responsabilidades políticas que deriven non podan ser efectivas”. “Negativa de aceptar máis comparecencias ou ampliar a información son algunhas das cuestións que deixan en evidencia a intención de ocultar do Goberno galego e o PP” concluíu Antón Sánchez.

La entrada O vicevoceiro de En Marea acude ao TSXG ante a continua vulneración dos seus dereitos como deputado por parte da Xunta de Galicia aparece primero en Contrainformación.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies