SATURDAY 23 FEBRUARY 2019

Archivos por Etiqueta: Villares

En Marea pedirá ao presidente da Xunta que diga que ten que agochar en relación á xestión do caso do PAC da Estrada e os enfermos de Hepatite C

O voceiro de En Marea, Luís Villares, informou dos temas que o seu grupo levará ao pleno do Parlamento da a tras a xunta de voceiros desta mañá. Entre eles a proposición non de lei para regular a provisión da xefatura de servizo no Sergas xa que “é necesario acabar co alto grao de discrecionalidade e arbitrariedade que se está a dar e establecer os méritos a valorar para que os traballadores e traballadoras réxense non só pola confianza política senón tamén pola meritocracia.

En Marea levará así mesmo unha proposición non de lei sobre o plan estratéxico de Galicia para o novo período da PAC na que se ten en conta a influencia do Brexit que suporá unha minoración dos fondos europeos e un cambio de estratexia da Unión Europea así como as directrices básicas dentro do reparto que fai o propio Estado e no que En Marea aposta porque sexa Galicia o que maior grao de competencia teña a hora de realizar este reparto.

O sector do automóbil será outro dos que centrará as iniciativas de En Marea ante o anuncio do ERTE por parte de PSA Vigo. Luís Villares considerou fundamental reclamar un plan industrial que supoña que todo os sector que vive arredor de Citröen teña un desenvolvemento acorde das posibilidades do noso país.

En Marea presentará tamén unha iniciativa na que se insta ao goberno galego a acabar de xeito definitivo co proxecto da Mina Touro-O Pino despois do informe recibido desde Europa no que se advirte das graves consecuencias que tería para o Camiño de Santiago seguir adiante con este proxecto. O voceiro lembrou un informe similar hai máis de 10 anos en Lugo respecto a unhas obras no cuartel de San Fernando que podería poñer en risco a declaración da muralla como Patrimonio da humanidade  motivo polo que a Xunta de Galicia desestimou estas obras. “Estamos nun suposto análogo polo que isto bastaría xa para dar para atrás a mina” salientou Vilares.

En relación a sesión de control, o voceiro de En Marea preguntará ao presidente da Xunta de Galicia, Alberto Núñez Feijóo, que ten que agochar en relación aos recortes na sanidade pública galega. “Despois da farsa de creación de comisión de investigación dos recortes queda en evidencia a obstaculización continuada para que a oposición faga o seu traballo e investigar o acontecido no PAC da Estrada, cos enfermos de hepatite C e o todos os recortes destes anos na sanidade” denunciou Villares.

O voceiro de En Marea considerou inxustificable a postura do PP que por un lado negan a participación dos familiares das vítimas do falecido no PAC da Estrada e das persoas que están a ser investigadas da Consellería en relación ás mortes por hepatite C, pero por outra non teñen problema algún de que familiares das vítimas do sinistro do marisquiño teñan voz na comisión de investigación que está tendo lugar tamén no Parlamento ou os familiares das vítimas do Alvia que tamén están a ser escoitadas no Congreso. “Non hai explicación racional que xustifique esta diferencia de trato” asegurou o que leva a se facer a pregunta sobre o que ten que ocultar o PP.  “Pretenden que falemos só de números, e nós dicimos non porque detrás dos números hai persoas que o pasaron moi mal a causa dos recortes” afirmou Villares. O mesmo acontece coa participación de Felix Ruibal que mentres o PPdeG vetaba a súa comparecencia na comisión de investigación sobre os recortes na sanidade, si participou na comisión de investigación do Marisquiño.

O voceiro de En Marea rematou asegurando que se trata dunha falla de respecto e unha diferencia de trato inadmisible e lembrou que non existe ningunha norma nin impedimento algún no regulamento que impida que as persoas investigadas polos casos mortes por hepatite C podan participar na comisión de investigación do Parlamento. Ante a negativa e o veto imposto polo PP, En Marea pedirá explicacións directas ao presidente da Xunta de Galicia sobre que é o que teñen que agochar para se comportar así.

En Marea insta a cumprir co acordo parlamentario acadado no que se pide a retirada inmediata e incondicional do ERE de extinción

O voceiro de En Marea, Luís Villares, instou á Xunta de Galicia a cumprir co acordo parlamentario acadado no día de onte en defensa dos postos de traballo de Alcoa na Coruña coa retirada inmediata e incondicional do ERE de extinción. “É evidente que hai que solucionar cara o futuro a situación e as axudas ás empresas electrointensivas, e sacalas da incertidume e da falta de garantías  que vaian mais alá da conta de resultados das empresas e que deberían ter en conta de maneira vinculante a renovación tecnolóxica e o mantemento do emprego” explicou Villares.

Ata o de agora isto non se fixo, cunha lexislación aparentemente errática e improvisada, con sucesión de parches de mínima duración que impedían un marco estable a longo prazo. “Unha situación que foi mantida de forma deliberada no tempo coa convivencia dun poder político dedicado a amparar ao oligopolio eléctrico, que este sabe agradecer, colocando aos seus máis ilustres exdirixentes en postos executivos, apelídense González, Aznar ou Fernández De Mesa, nun exercicio inaceptable de portas xiratorias entre poder político e empresa privada favorecida por eses que ocuparon antes postos políticos de relevancia, e que posteriormente exercen de lobbistas sobre os seus antigos compañeiros de Partido” afirmou Villares.

“Temos que desenchufar dunha vez por todas a convivencia co oligopolio eléctrico por parte do poder político, vía lexislación e vía subvención. Estamos nun escenario  no que non se pode falar de dar máis cartos sen condicións ás empresas electrointensivas como Alcoa” defendeu.

Na súa intervención Villares salientou a urxencia “vital” de cumprir o acordo parlamentario que debe marcar o inicio da unidade de acción entre Parlamento, Concellos afectados, Goberno da Xunta e Goberno do Estado, situándose a carón das traballadoras e traballadores de ALCOA. A esta unidade inicial debe seguir unha proposta conxunta, consensuada, que pense na xente, nos postos de traballo, no futuro industrial de Galicia e que incinere dunha vez por todas calquera dúbida sobre de que lado están as forzas políticas galegas. “Facer o contrario só beneficia a estratexia de Alcoa” concluíu Luís Villares.

Na súa intervención o voceiro de En Marea insistiu na necesidade de actuar a medio prazo facendo unha revisión total da lexislación eléctrica que non só pon en risco a viabilidade de toda a industria, mais alá das empresas electrointensivas, senón que supón unha lousa inasumible para a maioría dos fogares, cada vez máis nunha severa pobreza enerxética.

Para iso, é necesario desmontar toda unha lexislación moi complexa desenvolta durante moitos anos co único obxectivo de beneficiar ao oligopolio eléctrico como explicou o voceiro de En Marea pero a curto prazo, sinalou como como primeira medida sacar a produción hidráulica, eólica e nuclear das poxas diarias de enerxía e obrigar a que sexa vendida a longo prazo con prezos xustos e estables. Asemade, permitirase a contratación bilateral física entre produtores e grandes consumidores como Alcoa.

A longo prazo, pero con vista na renovación das institucións europeas que terá lugar o ano que vén, desenvolver aranceis medioambientais baseados na pegada de CO2 dos produtos que entren na UE procedentes de países terceiros.

O voceiro de En Marea rematou instando a ao Goberno galego e Estado a que, en caso de que Alcoa insista no peche, esixa a devolución dos 1.000 millóns de euros e incluso aplicar o artigo 182.2 da Constitución Española tendo en conta que Alcoa é monopolística na fabricación de aluminio en España. Lembremos que a CE establece que:
2. Recoñécese a iniciativa pública na actividade económica. Mediante lei poderase reservar ao sector público recursos ou servizos esenciais, especialmente en caso de monopolio e así mesmo acordar a intervención de empresas cando así o esixir o interese xeral.

En Marea amosa o seu apoio aos traballadores e traballadoras de Alcoa na Coruña e aseguran que “non imos parar ata que se levante o ERE de enriba da mesa”

En Marea mantivo unha xuntanza cos traballadores e traballadoras da factoría de Alcoa na Coruña para coñecer de primeira man a súa situación e trasladar o apoio tanto do grupo no Parlamento como no Congreso contra o anuncio de peche da empresa. Nesta xuntanza participaron o voceiro de En Marea, Luís Villares, o voceiro no Congreso, Antón Gómez Reino, xunto coa deputada no Congreso, Yolanda Díaz, e os deputados no Parlamento, Manuel Lago e Francisco Casal. Tras a reunión, ofreceron unhas declaracións aos medios de comunicación nas que o voceiro de En Marea referiuse á situación de Alcoa despois de se coñecer esta mañá os datos rexistrados en Wall Street que deron a maior subida a empresa tras anunciar os peches da Coruña e Avilés.

“Tendo en conta o millonario investimento en subvencións públicas para a súa actividade resulta unha auténtica burla á cidadanía que agora estean a repartir 200 millóns de euros en dividendos” declarou Villares.

Desde En Marea lembraron que durante anos se presentaron distintas iniciativas para dar solucións á situación mentras o Goberno de Rajoy estivo dando subvencións multimillonarias sen esixir investimento nas factorías, que non terían pechado a día de hoxe de terse dado esta modernización.

No caso de que se consolide o peche, o voceiro de En Marea instou a que se esixa a devolución destas axudas públicas á empresa para evitar que mentres uns accionistas en EEUU se reparten 200 millóns en beneficios, aquí centos de familias quedan na rúa.

O voceiro de En Marea considerou tamén imprescindible a modificación do sector eléctrico “para facer competitiva toda a industria” e a primeira medida “é sacar a produción hidraúlica, eólica e nuclear das poxas diarias de enerxía e obrigar a que sexa vendida a longo prazo con prezos xustos e estables”.
A deputada de En Marea e voceira de Industria no Congreso, Yolanda Díaz, quixo amosar a solidaridade coas traballadoras e traballadores de Alcoa e insistiu en que “non imos parar ata que se levante o ERE de enriba da mesa”.

“Tivemos unha xuntanza coa ministra de Industria e temos o seu compromiso e o do Goberno para crear a mesa tripartita na que tamén estén representadas as alcaldías da Coruña e Avilés, polo que non ten sentido que se tramite este expediente agora”, explicou Díaz, que lembrou tamén a petición de En Marea á ministra de Traballo para que levante o ERE mentres duren as negociacións polo futuro da empresa.

A deputada insistiu en lembrar que Alcoa recibiu moitos cartos públicos e ten obrigas tanto coa comarca de A Coruña como coa de Avilés, polo que “non imos parar de loitar”.

Pola súa banda, o voceiro de En Marea no Congreso, Antón Gómez.Reino, fixo tamén un chamamento á mobilización deste sábado para “defender aos nosos sectores produtivos, que son estratéxicos para o conxunto de Galicia”.

En Marea esixe ao Goberno paralizar o ERE durante a negociación porque “o prioritario son os postos de traballo”

En Marea insistiu en que despois do anuncio de Alcoa de pechar as plantas da Coruña e Avilés “o prioritario son os postos de traballo” e “solucións a medio e longo prazo para acabar con esta situación”, por iso solicitamos á ministra de Emprego, Magdalena Valerio, e á ministra de Industria, Reyes Maroto, que deteñan o ERE mentras esté en marcha a mesa de negociación.

“Dende onte estamos en permanente contacto cos traballadores, pero dende logo non pararemos para evitar o peche destas empresas. Emitimos cartas á ministra de Traballo e Industria pedindo que con carácter inmediato se levante o ERE extintivo rexistrado. Pedimos que intercedan porque non ten sentido que teñamos unha mesa de negociación cun ERE sobre a mesa”, explicou a deputada Yolanda Díaz en rolda de prensa este martes no Congreso.

O voceiro de En Marea amosou a firme intención de En Marea de facer “todo o posible en todas as frontes institucionais para preservar os postos de traballo de Alcoa”. Así mesmo lembrou que a empresa estivo cobrando durante anos importantes subvencións que nunca explicou a que foron destinados estes cartos.

Neste sentido considerou sorprendente que as dúas fábricas das que anuncian o peche, A Coruña e Avilés, sexan precisamente as que máis cartos públicos recibiron e criticou que se permita que estas empresas inclúan estas axudas na conta de beneficios en lugar de investir en melloras das fábricas.

Pola súa banda o vicevoceiro de En Marea no Parlamento, Antón Sánchez, lamentou que “unha vez máis os grandes prexudicados son os traballadores e traballadoras que dun dia para outro ven perigar 400 postos de traballo”.

“Nos últimos 20 anos a política da Xunta foi permitir espolio dunha empresa que era pública ao principio, e financiar con fondos públicos que rematan na conta de beneficios da empresa sen investir en melloras. Ao que se suman os privilexios á empresa e das eléctricas que cobran dos prezos máis altos de Europa” denunciou Sánchez.

A deputada Yolanda Díaz explicou tamén en detalle a xuntanza que mantivo onte coa Ministra de Industria, Reyes Maroto, para abordar o peche destes dous centros.

“A ministra da industria comprometeuse a constituír unha mesa bipartita entre as administraciones afectadas, tanto as administración do principado, da Xunta e das alcaldías, sindicatos e empresa. Non ten sentido que se constitúa a mesa cun ERE sobre a mesa”, insistiu Díaz, que remarcou que “a posición do noso grupo é a defensa e solidariedade coas traballadoras, por iso estaremos con elas en todas as manifestacións”.

En Marea denuncia o deterioro da atención sanitaria que os recortes do goberno de Núñez Feijóo están a provocar nas zonas rurais

O voceiro de En Marea, Luís Villares, visitou os centros de saúde de Pontenova e Meira en Lugo onde puido comprobar como a Xunta de Galicia está a impor unha continuada redución de servizos na sanidade no ámbito rural. No caso concreto de Pontenova non se vai cubrir unha das prazas de médico alegando que a ratio é suficiente pero a dispersión demográfica e o avellentamento da veciñanza require duns coidados médicos que non se están a cubrir. Existe tamén unha praza de celador que tampouco se está a cubrir e provoca que moita xente maior teña que se trasladar ao centro para pedir cita e facer determinadas xestións que podería facer doutro xeito se esa praza estivese cuberta.

No centro de saúde de Meira, que funciona de forma continuada para atender a toda a comarca, vive unha situación similar. O voceiro de En Marea sinalou a necesidade de contar cun segundo equipo médico completo para dar servizo a toda a poboación. Pero tamén é preciso cubrir unha praza de enfermeiro que está vacante neste momento.

“Non se lle pode pedir á xente que viva no rural cando despois non se lles ofrece servizos básicos como é o dereito á atención sanitaria proxima, vital para salvar vidas e que agora mesmo non se está a producir” denunciou Luís Villares.

Unha situación que non é exclusiva na montaña de Lugo senón que se está a repetir por todo Galicia e que se está a agravar no verán co peche de camas nos hospitais, peche de servizos de pediatría en distintos lugares do noso país que está a provocar unha perda de dereitos e deterioro da calidade de vida das persoas que viven no rural. Ante isto que fai o goberno de Núñez Feijóo? absolutamente nada” remarcou Luís Villares polo que anunciou a intención do seu grupo de continuar a loitar ata lograr que a toda a poboación galega teña os mesmos dereitos e calidade de vida independentemente da zona na que viva.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies