SATURDAY 23 FEBRUARY 2019

Archivos por Etiqueta: Galicia

Máis dun 90 % dos votantes piden abolir a monarquía no referendo convocado no campus universitario de Ourense

A comunidade universitaria do campus de Ourense foi chamada a participar no referendo sobre a monarquía. A pregunta era sinxela: “estás a favor de abolir a monarquía como forma de estado e instaurar unha república que abra procesos constituíntes?As posibles respostas eran sí ou non.

As urnas abriron ás 09.00 horas, estando ubicada unha delas no Edificio de Ferro e outra no Xurídico-Empresarial, e pecharonse ás 20.00 h. A chamada á participación inclúe a toda a comunidade universitaria, tanto alumnado como persoal docente e investigador e persoal de administración e servizos.

A resposta foi clara. No campus ourensán, depedente da Universidade de Vigo, votaron 713 persoas das que 647 pronunciáronse a favor da supresión da monarquía, un 90,74% mentres que soamente 63 o facían a favor de continuara o actual sistema (un 8,84%).

 

Gráfica por Pedro Manuel Carro Parafita

A participación foi, según o informe aportado polo encargado de procesamento de datos da organización, Pedro Manuel Carro Parafita, maioritariamente feminina. Un 52,7 % de mulleres votaron na facultade de dereito e un 63,9 % na de Sociais.

Gráfica por Pedro Manuel Carro Parafita

Carlos, un dos organizadores, indicou o ser preguntado polos resultados que “o importante foi a iniciativa. De novo volve a visualizarse que o estudantado ten opinión e pode ter moita forza se se mobiliza

A consulta tamén se realizou noutras 23 universidades públicas do estado. O resultado no resto das universidades galegas foi abrumador a favor da abolición da monarquía. Na Universidade de Santiago de Santiago de Compostela (USC) votaron máis de 3500 persoas. Houbo 3305 a favor da abolición da monarquía e soamente 261 en contra.

Na universidade da Coruña (UDC) o resultado foi moi similar. Participaron 2064 persoas das que votaron a favor de que desapareza a monarquía 1810. Un 87,69%. No campus de Ferrol, dependente da USC, as persoas votaron a favor da abolición da monarquía foron un 84,7%.

O Parlamento aproba por unanimidade a iniciativa de En Marea para establecer unha política retributiva máis transparente dos cargos públicos

O Parlamento de Galicia aprobou por unanimidade a proposición de Lei presentada pola vicevoceira de En Marea, Carmen Santos, na que se insta á Xunta a realizar un estudo no que se analice o actual esquema retributivo dos responsables públicos galegos e realizar unha proposta que amose un compromiso real para establecer unha política retributiva máis transparente e coherente co fin de reducir o gasto total en soldos públicos.

Na súa intervención, Carmen Santos defendeu que a crise económica e as súas nefastas consecuencias foi sentida como unha estafa por grande parte da cidadanía e que veu xerada por diferentes motivos. “Uns dos máis relevantes, que ocasionou grande indignación a milleiros de cidadáns e cidadás, é que mentres os executivos no goberno aplicaban duros recortes sociais e laborais ao conxunto da cidadanía rebaixando as súas condicións de vida, este modus operandi aplicado sen compaixón á maioría social non era equivalente na súa aplicación aos altos cargos e directivos en todos os eidos, nin eran equivalentes na súa aplicación para tender á redución do gasto público, aos salarios e privilexios de innumerables cargos políticos e cargos públicos” declarou Santos.

Tal e como explicou a vicevoceira de En Marea, “certos partidos e executivos, intentan xustificar e defender estas políticas para non aplicar novas formas de limitación salarial con carácter exemplificante, ademais de para reducir o gasto público, dicindo que non se arranxa nada con estas medidas, que non se poden ter políticos low cost, que non supón un aforro orzamentario significativo ou que son medidas populistas”. Pese a isto. lembrou como Alberto Núñez Feijóo baseou a súa campaña electoral do 2009 na denuncia do despilfarro en supostos coches de luxo e en soldos de conselleiros e
de cargos de “chiringuitos” do bipartito. “Unha agresiva campaña que tivo impacto nos medios e coa que conseguiu chegar á Presidencia da Xunta” afirmou. Nove anos despois, e xa afianzado como presidente con tres gobernos consecutivos de maioría absoluta, aquelas denuncias de despilfarro parece que non existiron, e o Partido Popular de Galicia acusa a quen denuncia estas prácticas de maneira reiterada de “populistas”.

Así, como subliñou Carmen Santos a día de hoxe o presidente galego defende os soldos astronómicos para cargos e entidades que moitos cidadás e cidadáns poden percibir como chiringuitos, como é o caso do Suplusa, da Deputación de Lugo. “Para o goberno da Xunta e o seu presidente, a crise rematou ou non, según a súa conveniencia política, ou de intereses que nada teñen que ver cos dos cidadáns que ten que gobernar” lamentou. “Feijóo apoiou que o seu partido aprobara para o ex socialista, e deputado non adscrito en Lugo, Manuel Martínez, un salario superior aos 71.000 euros, case o mesmo que cobra el mesmo como Presidente da Xunta, que cobra 72.000 euros de salario on argumentos esperpénticos, unha decisión na que deron marcha atrás a semana pasada despois de que En Marea incluíse no pleno esta iniciativa” destacou Carmen Santos.

“O que observamos son escusas para colocar a unha clientela política e pagala cos cartos de todos e todas. Este tipo de prácticas, que agochan accións escurantistas e clientelares, teñen o noso total rexeitamento porque ademais de non ser éticas, e en certos casos dubidosamente legais, son infames xa que se sufragan cos cartos de todos e de todas” asegurou Carmen Santos.

A vicevoceira de En Marea no Parlamento incidiu no rexeitamento radical do seu grupo contra este modelo de goberno e por este motivo presentou esta iniciativa no Parlamento que finalmente logrou o apoio unánime de toda a Cámara galega.

Montse Prado critica a incapacidade da Xunta para negociar un reparto da cota que beneficie á frota galega

Denuncia que carece de “peso político” e que prima á pesca industrial en detrimento da artesanal “que é a que crea emprego e xera rendas no litoral”

A portavoz de Pesca, Montse Prado, criticou a incapacidade da Xunta para defender os intereses da frota galega no marco da negociación das cotas de pesca e do total admisible de capturas que propón a Comisión Europea para 2019, repetindo a mesma escenificación de pretender pasar como éxito o que non é máis que outra volta de torca ao sector, con novas reducións na súa capacidade de pesca traendo a Cámara unha proposta pechada que xa foi negociada e presentada en Madrid.

“Ven a este Parlamento a que señora conselleira”, interpelou Prado, tras lembrar que “Galiza é o país que máis peso relativo perdeu en pesca dentro da UE por decisións tomados desde Madrid e desde Bruxelas que, desde sempre, someteron á frota galega a unhas condicións leoninas baixo criterios prexudiciais nunca revisados”, indicou Prado na súa intervención de réplica á conselleira do Mar.

“O modelo de cotas e de TACs demostrouse demoledor para o mantemento do emprego en Galiza. Un informe do Consello Galego de Pesca indica unha caída da frota do 20% entre 2004-2014 por déficit de cota ou abanderamento noutros países, e a perda de 3.369 persoas afiliadas á seguridade social no sector pesqueiro e da acuicultura”, explicou.

Prado salientou que este país carece dunha cota de pesca acorde ao tamaño da súa frota, e puxo como exemplo o feito de que o Estado español dispón do 9,6% das cotas do Gran Sol e o 22,6% da frota, mentres que Francia que ten un 9,6% da frota dispón dun terzo da cota de pesca neste caladoiro.

A deputada do Bloque atribuíu este reparto prexudicial para Galiza “á falta de peso político” do Goberno da Xunta que, ademais, toma partido pola pesca industrial en detrimento da pesca artesanal. “Non son capaces de exercer peso político para facer valer os dereitos da pesca artesanal galega, que é a crea rendas e xera emprego no litoral, traballan só para a pesca industrial e o gran capital”, denunciou, e tampouco se ten en conta á hora do reparto de cota se o produto se utiliza para consumo humano ou se vai para a elaboración de produtos procesados como fariñas.

Prado preguntou á titular da Consellería do Mar se a proposta de reparto de cota de pesca para 2019 que propón a Comisión Europea “corrixe e compensa a redución de esforzo pesqueiro que fixo a nosa frota para adaptarse aos plans impostos polo poder económico, que tivo consecuencias brutais. Vai esixir compensacións e que se reverta esa situación en lugar de que se acepte un criterio que sigue esixindo a redución de capacidade pesqueira para Galiza?”, interpelou sen obter resposta.

O BNG denuncia que o reparto segue a facerse en función dos intereses dos Estados e non das realidades pesqueiras, primando a pesca industrial do norte en detrimento da pesca artesanal, un modelo que deixa sen dereitos ás comunidades pesqueiras, “unha PPo liberal que o PP non cuestiona pero que deixa a maior parte das cotas de pesca en mans dun puñado de armadores e os dereitos de pesca aos Estados membros”, concluíu Prado.

En Marea insta á Xunta a aportar persoal e medios que palíen as graves carencias dos servizos de urxencias

En Marea reclama solucións urxentes ás graves carencias que atravesan as os servizos de urxencias dos hospitais galegos, e ante as que, a pesar das mobilizacións e folgas impulsadas polo persoal sanitario, a Consellería fai ouvidos xordos. Así o reclamou no pleno do Parlamento a vicepresidenta da Cámara e deputada Eva Solla, que presentou unha moción na que se instaba a poñer solución ao déficit de medios humanos e materias que están a sufrir os nomeados servizos no conxunto dos centros hospitalarios galegos.

Eva Solla denunciou a insensibilidade e a total ausencia de voltade de diálogo da Consellería de Sanidade. Un departamento que “fai augas”, e que en lugar de aportar solucións se empeña en negar o evidente e gravísimo deterioro da asistencia sanitaria.

“Falamos de carencias que son transversais ao conxunto do sistema sanitario e que xeran sufrimento ao persoal, que non pode conciliar, que se vé obrigado a facer gardas e horas extra sen alternativa e sentíndose desprezados, porque non hai ninguén na Consellería que escoite as súas demandas”, denuncia a deputada.

A representante de En Marea lembrou o mes de folga que xa leva o servizo de urxencias do CHUS, así como os dous meses  que pasaron desde que os PACs comezaron tamén a súa folga reclamando profesionais suficientes para dar unha mellor atención. Unha situación límite que, tal e como destaca Eva Solla, representa “o termómetro da grave situación que atravesa o conxunto da sanidade galega”.

“O incremento das urxencias está moi ligado ao deterioro da atención primaria. Moitos profesionais non poden dar atención a domicilio ante o colapso das consultas nos centros de saúde, con agardas de ata dez días que levan ao consecuente incremento das demandas de atención en PACs e Urxencias”. Así o destacou Eva Solla no pleno, no que tamén puxo de manifesto a relación entre a sobrecarga das urxencias e as elevadas listas de agarda nas consultas de atención especializada. “Para oftalmoloxía a agarda é duns 9 meses; cardioloxía, ano e medio. Falamos de situacións que provocan un elevado deterioro da saúde das persoas enfermas, que cando empeoran sen posibilidade de ser vistas polo seu especialista recorren tamén ás urxencias hospitalarias”.

A deputada de En Marea denuncia a “xestión absolutamente nefasta” que o goberno do Partido Popular está realizado da sanidade pública. “A pesar do colapso das urxencias, mantéñense plantas pechadas na Coruña, no Salnés e en Compostela. Abrilas, incrementar a plantilla do sistema sanitario público e cubrir as carencias nos servizos de urxencias é a solución. Tamén elaborar plans funcionais de servizo, e escoitar as demandas dos profesionais”, demanda Solla.

Para En Marea non cabe seguir agardando máis, e ante a pasividade do executivo da Xunta, que durante anos non planificou a necesidade dos MIR ou de enfermería”, esixe medidas que palíen as graves carencias. “Non contrata de forma estable, polo que os profesionais marchan; non se cubren baixas e vacacións; móvese oas profesionais entre servizos provocando descubertos; hai problemas nos PACs, nas urxencias, no 061; hai desabastecemento de fármacos. Faltan pediatras, hai informes negativos do Consello de Contas, temos sobre a mesa a xantaxe de Povisa e segue sen haber ningunha solución real. A Consellería fai augas”, conclúe a deputada.

Coa proposta defendida por Eva Solla o grupo de En Marea fai un chamamento á Xunta de Galicia para incrementar os efectivos profesionais nos servizos de urxencias tanto de atención primaria como de atención especializada de xeito permanente, acordando coas representantes sindicais das e dos traballadores as melloras necesarias no inmediato.

Así mesmo reclama a apertura das plantas e alas inoperativas de xeito permanente, dotándoas co persoal necesario para absorber as necesidades de ingresos hospitalarios e establecer protocolos para asistencia ás persoas pendentes de ingreso. Ademais, considera urxente atender o incremento de efectivos de persoal nas urxencias do CHUS, demandados pola Xunta de Persoal, así como a substitución do 100 por cento das ausencias e o cumprimento dos requirimentos da Inspección de Traballo.

Por último, En Marea pide a elaboración dun plan funcional para as urxencias do Complexo Hospitalario Uuniversitario de Santiago (CHUS) negociado coa Xunta de Persoal e repoñer o material obsoleto nos hospitais do Servizo Galego de Saúde, con especial atención ao material das urxencias do CHUS.

Pontón a Feixóo: “Benvido sexa que agora o PP vote a lei de transferencia da AP9 redactada polo BNG”

Critica o “cutre” balance en materia de autogoberno: Dez anos, cero transferencias porque non confía nas capacidades de Galiza e actuou “como palmeiro da recentralización”

A portavoz nacional, Ana Pontón, ve positivo que o PP, -agora que está na oposición e aínda que sexa por electoralismo-, vaia apoiar a Lei de transferencia da AP9 redactada e impulsada polo BNG no debate que terá lugar o vindeiro martes no Congreso, despois de pasar anos vetando a xestión galega desta infraestrutura tanto desde o Goberno de Raxoi como na propia Cámara baixa.

“Quen impediu a transferencia da AP9 foi o PP porque xa votaron en contra da transferencia en 2015 no Congreso e se agora, grazas a unha moción de censura que os desaloxou do Goberno co apoio do nacionalismo, levantan o veto e votan a favor dunha Lei redactada polo BNG, benvido sexa”, salientou Pontón, “esa lei non a redactou nin vostede nin o PP, redactouna o BNG”, recalcou.

A dirixente nacionalista utilizou a sesión de control para denunciar o “paupérrimo” balance de Feixóo en materia de autogoberno, pois tras unha década en Monte Pío foi incapaz de conseguir nin unha soa transferencia para Galiza e, por contra, abrazou a estratexia recentralizadora do PP. “Dez anos, cero competencias, ese o seu récord”, ironizou, tras definir ao presidente da Xunta como “palmeiro” do centralismo.

“Lonxe de avanzar, con vostede retrocedemos porque o seu balanzo en autogoberno é tan cutre que nos fixo perder peso político e perder oportunidades para mellorar a vida das persoas, é tan cutre que nin sequera conseguiu que o PP permitira o debate da transferencia da AP9, só logrou o veto e que subiran máis as peaxes”, denuncio.

De feito, Pontón responsabilizou ao presidente do PPdeG de ser o responsable “do maior ataque ao autogoberno” de Galiza nos últimos anos, “aplaudindo” as leis recentralizadores aprobadas en Madrid e permitindo a desaparición dunha ferramenta tan importante como a sistema financeiro galego, “co seu silencio cómplice”. “É o Estado quen decide canto podemos gastar, quen decide cantos profesores e médicas podemos contratar, quen decide que impostos pagamos e fai un reparto inxusto quitándonos recursos que necesitamos para servizos públicos”, argumentou Pontón para denunciar o peso “abafante” da recentralización.

A dirixente do Bloque instou a Feixóo a “descolgarse” da ofensiva recentralizadora do presidente do PP, Pablo Casado: “Deixe  claro que  o profesorado vai seleccionarse aquí, non en Madrid,  e que coñecerá o idioma deste país”, ademais de propoñerlle a defensa dunha axenda galega para reclamar un paquete mínimo de competencias, entre as que citou tráfico,  trens, portos e aeroportos, bolsa de estudos e un marco galego de relacións laborais para poñer fin á precariedade.

Fronte a esa falta de ambición de Feixóo,  Pontón salientou que o BNG si confía no potencial deste país, definiu  Galiza como nación e deixou claro que o actual marco constitucional está superado.

“Se necesita o apoio do BNG para exercer como presidente da Xunta e reclamar para Galiza o que lle corresponde vaino ter, todo o apoio do BNG, a ver se agora que non gobernan en Madrid espertan do seu soño. O que defende o BNG é que Galiza é unha nación con dereito a decidir o seu futuro e que ningunha decisión adoptada fai corenta anos pode privarnos dese dereito”, recalcou.

Pontón replicou a Feixóo que o único xiro político foi o do PP coa súa aproximación á extrema dereita, “acercándose a un partido racista, xenófobo, homófobo, machista e antigalego, ese é o xiro do PP”, concluíu.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies