SATURDAY 23 FEBRUARY 2019

Archivos por Etiqueta: CIG

A CIG consegue un triunfo histórico en Mercadona

André Abeledo, actualmente delegado de persoal no comité Provincial de Mercadona de A Coruña pola CIG, e Concelleiro de EU NARÓN, seguirá representando aos traballadores de Mercadona na comarca e na Provincia logo dun resultado histórico da CIG en Mercadona.

A candidatura encabezada por María López Alejos, a traballadora de Mercadona que denunciou a actitude antisindical da empresa no programa de “Salvados”, de La Sexta, venceu con contundencia nas eleccións sindicais celebadas este mércores 28 de Novembro nos centros de Mercadonana Praza de A Coruña.

André Abeledo declarou que “o triunfo da CIG Mercadona na provincia de A Coruña é o triunfo dos traballadores e traballadoras”.

“A maioría absoluta da CIG en Marcadona de A Coruña pode considerarse histórica”, añadiu o concelleiro.

Especialistas:
11 – C I G

5 – UGT

3 – CCOO

Técnicos:
1 – UGT

1 – CCOO

Os traballadores/as de Alcoa esixen na Delegación do Goberno medidas urxentes para paralizar o ERE

Os traballadores e as traballadoras de Alcoa trasladaron na tarde deste luns as mobilizacións contra o peche da fábrica até a Delegación do Goberno na Coruña, cunha demanda inaprazábel: esixir do Executivo central medidas de urxencia para paralizar o ERE de extinción, garantir a continuidade dos empregos e a actividade produtiva e, dunha vez, avanzar na creación dunha tarifa industrial estábel, predicíbel e que recoñeza o estatus das empresas electrointensivas.

“Urxe tomar medidas e tomalas xa”, advertía durante a protesta Julio Moskowich, membro do comité pola CIG. “O Goberno español non pode seguir agardando, ten que pór en marcha medidas inmediatas para evitar o peche da fábrica, incluída a nacionalización da empresa”, aseverou. Lembra que Alcoa estivo no seu día, como INESPAL, no sector público e se a multinacional persiste na súa idea de pechar a planta da Coruña, sería na SEPI o lugar axeitado onde as instalacións se terían que reincorporar.

Ademais, apunta que, a pesar das limitacións introducidas pola reforma laboral de 2012, a lexislación laboral actual permitiría adoptar medidas para paralizar o ERE, “só fai falta ter unha vontade política que até agora non estamos percibindo”. Abundando nesta cuestión, denunciou que as actuacións realizadas polo Goberno español e a Xunta de Galiza non están a altura das circunstancias que require a defensa do emprego e do tecido industrial e demostran a incapacidade de ambas as Administracións para responder as ameazas de Alcoa.

Necesidade de crear unha tarifa industrial estábel

Xunto á retirada inaprazábel do ERE, a sección sindical da CIG esixe do Goberno español que comece xa a traballar na creación dunha tarifa industrial estábel, predicíbel “e que nos permita ser competitivos”. “O gran problema desta fábrica non está nin no prezo da materia prima nin na suposta obsolescencia das instalacións, está nos elevados custes da electricidade”, afirma.

Neste senso, Moskowich lembra que a CIG xa lle trasladou á Xunta, ao Goberno estatal e á patronal do sector unha proposta de creación dunha tarifa industrial estábel, con variacións predicíbeis, á que se poidan acoller as empresas electrointensivas, baixo o cumprimento dunha serie de requisitos (entre os cales está o mantemento do emprego) e que recoñeza o estatus específico deste tipo de industrias grandes consumidoras de enerxía. “É intolerábel que nun país como Galiza, que produce e exporta enerxía, periguen os postos de traballo e pechen industrias polo prezo da electricidade”.

O próximo venres, 30 de novembro, os traballadores e as traballadoras van secundar unha xornada de folga de 24 horas na fábrica da Coruña. Ese día, segundo as pretensións da multinacional, está previsto que finalice o período de consultas do ERE. A representación da planta galega non recoñece o marco de negociación imposto por Alcoa, porque son dous centros de traballo diferentes e entenden que os expedientes deben ser negociados separadamente por cada un dos comités.

A empresa non acepta a mediación

Para dirimir este punto, a representación social propuxo a mediación do AGA e o pasado sábado houbo reunión coa presidenta do Consello Galego de Relacións Laborais para que iniciara a tramitación do proceso. Porén, Alcoa comunicaba esta tarde a súa negativa a aceptar a mediación, dando unha mostra da escasa vontade negociadora que ten.

Así as cousas, o comité acordou asistir mañá martes á mesa convocada en Madrid “máis para comunicar, novamente, o noso desacordo co marco de negociación e esixir a retirada do ERE. Esta fábrica é viábel, ten futuro e imos loitar até o final por garantir os empregos e o mantemento da actividade produtiva”.

A CIG pide que se cumpra coa declaración aprobada no Parlamento

O tempo bótase enriba e por iso, a CIG reitera o chamamento que lanzou a pasada semana á Xunta de Galiza para que dea cumprimento da declaración institucional aprobada no Parlamento galego o pasado mes de outubro, pola cal se insta á Consellaría de Industria a artellar unha fronte común política e sindical na defensa do emprego en Alcoa e dun sector estratéxico para o noso país, como é do aluminio.

O secretario xeral da CIG, Paulo Carril, volveu emprazar a Xunta para que dea cumprimento inmediato desta declaración e que se constitúa unha mesa de traballo en Galiza (integrada por sindicatos, comités, empresas electrointensivas e institucións) “para que o Goberno galego leve a Madrid unha postura galega, igual que dende Asturias levan unha proposta asturiana, e non un posicionamento que responda unicamente á visión do PP”.

CCOO, CIG, CSI-F e UGT acusan o novo conselleiro do Medio Rural de «mentir sen pudor» no Parlamento

CCOO, CIG, CSI-F e UGT acusan o novo conselleiro do Medio Rural de «mentir sen pudor» no Parlamento. O titular da carteira, José González Vázquez, afirmou nunha intervención na Cámara autonómica que estaba a rematar coa temporalidade no Servizo Público de Defensa contra Incendios Forestais (SPDCIF). Porén, os sindicatos ínstano a «non faltar á verdade» e lémbranlle que o 60 % do servizo está formado por persoal temporal «en fraude de lei».

Bombeiros forestais traballando na extinción dun incendio
Bombeiros forestais traballando na extinción dun incendio

Segundo os sindicatos, o colectivo consta de 1939 traballadoras e traballadores, dos cales 1200 son temporais en fraude de lei, pois levan máis de tres anos nas súas prazas sen que a Administración lles dese a oportunidade de consolidalas mediante un concurso-oposición, tal como esixe a Lei de emprego público de Galicia.

Doutra banda, do total de efectivos, 436 teñen un contrato de catro meses e outros 610, de nove meses, que suman 1046 traballadores e traballadoras. Isto é, máis da metade do operativo traballa só uns meses ao ano.

Non hai incremento de persoal

Os sindicatos tamén lle reprochan a González Vázquez que o ano que vén non se incrementará en 600 persoas o efectivo, como afirmou perante as deputadas e deputados. Realmente, vanse trasladar á Xunta os postos de traballo que en anos anteriores contrataba durante a época de alto risco á empresa pública Servizos Agrarios Galegos S. A. (SEAGA). Polo tanto, o incremento de efectivos «é igual a cero».

Non hai prevención

CCOO, CIG, CSI-F e UGT aseguran que non hai unha aposta da Xunta pola prevención de incendios. «É unha falacia, porque case todo o orzamento, máis de cen millóns, gástase en extinción». Para as catro organizacións, a maior proba de que non hai prevención é que, no lapso dun mes —do 31 de outubro ao 30 de novembro—, a Consellaría do Medio Rural envía ao paro máis de mil traballadores e traballadoras do SPDCIF, após remataren os contratos de catro e nove meses.

Reunión co conselleiro

Debido a esta situación, os catro sindicatos instan o novo conselleiro a recibir «de maneira urxente» a representación legal do colectivo para constituír unha mesa de diálogo que permita atopar solucións a esta precariedade.

Por último, CCOO, CIG, CSI-F e UGT anuncian que pedirán reunións coas deputadas e deputados que constitúen o grupo de especialistas que se encargará de revisar o funcionamento do SPDCIF, aos que exporán as súas reivindicacións.

A afiliación á S.S. cae 3,4 veces máis do que sobe o paro malia asinarse case 100.000 contratos en Galiza en setembro

O mercado  laboral non varía no mes de setembro. Coa fin do período estival, comeza a medrar o desemprego, a pesar do que se mantén unha elevadísima contratación debido á alta rotación e a escasa duración dos contratos. Isto, unido ao forte descenso da afiliación á Seguridade Social, moi por encima do medre das persoas desempregadas, amosa unha realidade laboral moi precaria, en parte oculta pola emigración, que é a que explica o desfase entre afiliación e paro rexistrado.

 “Consolídanse en Galiza os efectos perniciosos das reformas laborais do PSOE e do PP”. Así se tira dos datos de paro rexistrado do mes de setembro, segundo o secretario confederal de Emprego da CIG, Fran Cartelle. “Esas reformas laborais que no seu día o actual presidente do goberno considerou que eran unha emenda á totalidade ás políticas laborais do PP e que, porén, hoxe, considera que son positivas aínda que haxa que mellorar a calidade do emprego”.

O desemprego sobe en Galiza un 1,15% respecto do mes anterior, o que equivale a 1.896 persoas desempregadas máis, alcanzando a cifra de 166.320 persoas rexistradas. E faino por riba da media estatal, onde o incremento do desemprego foi do 0,64%, case a metade.

Con todo esta tendencia é a acostumada neste mes, onde rematan parte das contratacións no sector servizos ligadas ao período estival e este ano non foi unha excepción. Proba diso é que foi en Servizos no único sector de actividade onde medrou o desemprego, concretamente un 1,32% en Galicia (2% na media do estado); na construción descendeu un 1,71% ( – 2,66% no estado español), e no sector industrial o descenso foi dun 0,11% ( na media do estatal baixou un 0,86%).

O descenso da afiliación á Seguridade Social é 3,4 veces superior ao medre do paro

Porén, malia seguir a tendencia estacional, o que pon en evidencia o fracaso das políticas económicas e laborais dos gobernos da Xunta e do Estado, e nomeadamente as súas consecuencias, é que a perda real de empregos foi moi superior ao medre do paro rexistrado. Os datos de afiliación á Seguridade Social amosan 6.500 persoas afiliadas menos, de media, que no mes de agosto o que dá nun descenso da afiliación 3,4 veces superior o incremento do desemprego.

Cartelle atribúe esta diferenza entre o paro rexistrado e a afiliación á Seguridade Social á forte emigración que se mantén e afirma que “os datos de paro rexistrado poderían ser moito peores de se ter en conta a terrible emigración de mocidade que sofre Galiza”.

Precariedade

No que atinxe á contratación, continúa coa tendencia dos últimos anos acadando todos os meses valores moi altos á marxe de cómo evolucione o emprego. Aínda así, non deixa de ser rechamante que incrementándose o paro rexistrado e descendendo a afiliación á Seguridade Social cheguen a rexistrarse 96.818 contratos no mes de setembro.

Este dato evidencia a enorme precariedade que sofre a clase traballadora galega porque deses case 100.000 contratos asinados preto do 90% foi baixo algunha das modalidades de contratación temporal e o 76,5% no sector servizos, casualmente o único sector onde medrou o desemprego.

O secretario confederal de Emprego da CIG denuncia, ademais do medre da temporalidade e da elevadísima rotación, que case a metade dos contratos temporais ou indefinidos asinados son contratos a tempo parcial. Iso xunto co feito de que practicamente a metade das persoas desempregadas non teñen cobertura e as que a teñen, na súa maioría son subsidios.

Por iso demanda a inmediata retirada das reformas laborais do PSOE e do PP que son as que están causando “este cada vez maior deterioro da calidade do emprego e non serven para reducir a taxa de desemprego brutal que hai no Estado español”.

CIG denuncia que educación modificou o cadro de persoal de Infantil e Primaria, eliminando 58 empregos e 54 aulas

A federación de Ensino da CIG vén de denuncia a Consellaría de Educación, “verdadeiro exemplo de falta de transparencia e ausencia de negociación” executa unha modificación dos cadros de persoal do corpo de mestres/as sen previa negociación coas organizacións sindicais. A medida, que implica contar para o curso 2018/19 con 54 aulas menos das que existen neste final de curso, “supón un novo recorte do persoal docente (58 empregos en total) na dilatada política do PP de reducir o número de profesionais do ensino público”.

Dende a CIG-Ensino censuran que de novo a Consellaría impón estes recortes sen que exista un mínimo contraste nin negociacións no seo da mesa sectorial. “Padecemos unha Administración que vive instalada na soberbia e no desprezo ao profesorado e que impón unilateralmente cambios de relevancia como modificar os cadros de persoal dos centros sen nin sequera ouvir previamente á representación sindical”.

A supresión de unidades educativas afecta especialmente ás provincias da Coruña e Pontevedra, nas que se pechan tanto aulas creadas oficialmente -e que, por tanto, figuraban nos catálogos a efectos da súa cobertura con docentes definitivos- como aulas habilitadas (aquelas que se abriron nos últimos anos e que agora se pechan sen que nunca foran cubertas definitivamente).

O peche destas aulas leva consigo a perda de 58 postos de traballo, que afecta especialmente a docentes das especialidades de Infantil e Primaria. “A cifra de eliminación de postos docentes elévase a 85 se temos en conta as especialidades de EI, EP, Inglés, Francés , Música e Educación Física; só a creación de novos postos en especialidades como PT, AL ou Orientación (27 en total) permite reducir a cifra final de recortes”, rematan.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies