En Marea levará ao Parlamento iniciativas para romper o “asedio” que mantén o PP sobre a cultura ourensá

O voceiro de Ourense en Común volverá pedir no pleno municipal a dimisión da titular da área de Cultura no concello.

Ánxeles Cuña apuntou que se non pode “enfrontar” o pasado co presente e que as cousas que funcionaban ben “como a Casa da Xuventude” non deberían cambiarse.

A deputada de por Ourense, Ánxeles Cuña asegurou que a cultura na cidade estaba “sufrindo un asedio por parte do PP”. Este “asedio” significa que se tentan desactivar todas as iniciativas culturais de base, de carácter participativo ou que teñan que ver coa mellor historia dos movementos culturais de Ourense, como pode ser a Casa da Xuventude. Na rolda de prensa na que se presentaron as iniciativas que se van levar ao Parlamento de Galicia, o voceiro de Ourense en Común, Martiño Xosé Vázquez explicou que se volverá a pedir no pleno municipal a “dimisión da responsable de Cultura do PP” por unha xestión que só conduce a desactivar a vida cultural na cidade.

Para Ánxeles Cuña “a cidadanía de Ourense ama a cultura” e o actual goberno municipal só está dando pasos para acabar coa vida cultura da cidade. Cuña sinalou que a histora de Ourense explica a súa relación coa cultura porque a cultura en Ourense “é un sinal de identidade, algo que nos caracterizou desde sempre e co que nos sentimos identificados”. Para a deputada esta identificación vén de antigo, “pero agora non se trata de falar do pasado, senón do presente cultura da cidade, un presente que o PP mantén en asedio para someter a toda a cultura da xente, de base, participativa”.

Para a deputada por Ourense, hai situación moi obvias que explican como se está traballando para “esnaquizar a cultura ourensán”. Citou, entre outros casos, o exemplo da Casa da Xuventude “unha entidade que funcionou de maneira modélica con Benito Losada e que non necesitaba eses cambios introducidos pola Xunta para facela desaparecer”. Tamén se referiu Cuña Bóveda a situación de desaparición ou crise pola que pasan os festivais, as actividades e moitos colectivos na cidade “aos que se lles retirou o apoio económico”. Cuña Bóveda tamén se referiu ás figuras da cultura da cidade, como o propio Benito Losada ou Marcos Valcárcel para exemplificar un tipo de modelo cultural que existe en Ourense que serve para ter “unha cidade mellor, unha cultura que suma e que engade valor”.

Pola súa parte, o voceiro de Ourense en Común, Martiño Xosé Vázquez, explicou que en Galicia fálase moito de Ourense como Atenas de Galicia e “mesmo o alcalde non deixa de utilizar esta expresión, pero non ten dereito a usala porque o seu goberno está tentando que Ourense deixe de ser unha cidade cultural como foi sempre”. O voceiro de OUeC explicou que non se pode considerar “casual” a perda progresiva de actividade cultural na cidade que ten “unha relación directa coa forma en que goberna o PP e en que tipo de actividades culturais favorece”. Vázquez sinalou que Ourense en Común volvería a pedir no pleno municipal a “dimisión da concelleira de Cultura porque a situación cultural da cidade non pode estar en peor situación”.

Vázquez asegurou que casos como o do festival de cine, que foi un dos emblemas da cidade, era a demostración da mala xestión do PP na cidade e cualificou de moi malo que “este festival creado desde a cidade acabe sendo xestionado desde o Pazo provincial”.

Deja un comentario