SATURDAY 20 APRIL 2019

A deputada Noa Presas trasladou ao Parlamento a necesidade de que a Galiza de 2018 abra un debate sobre o desenvolvemento da Lei de violencia “para que as violencias sexuais estean tamén no centro das actuacións xudiciais, en particular á vista da preeminencia dunha conduta patriarcal na xustiza e da necesidade de dotármonos dun sistema xudicial con perspectiva de xénero”.

O polémico caso da sentenza da manada demostra até que punto é preciso esa perspectiva de xénero tamén na Administración de Xustiza, pero pese a todo o que queda por facer, “a Xunta carece dunha folla de ruta para avanzar no recoñecemento real da violencia sexual como violencia machista”.

Presas salientou que a lexislación estatal “é moi inferior á do noso país e iso supuxo un lastre para Galiza”, e o pacto de Estado contra a violencia machista parecía que ía corrixirse algunha cuestión, “pero un ano despois continúa a ser papel mollado”.  E neste contexto, o BNG insta á Xunta a que bote man da comisión de seguimento para ser esixente co Goberno central e tentar sortear eses lastres.

Sobre o papel, alegou a deputada nacionalista, Galiza leva unha década á vangarda, “pero non foi capaz de trasladar á sociedade que a sexual é violencia, nin pode estar satisfeita co desenvolvemento da lei galega neste ámbito, nin se ten trasladado aos instrumentos de prevención e intervención”.

O BNG denuncia falta de información e investigación para coñecer a incidencia real da violencia sexual e actuar contra ela de forma efectiva. “O pouco que sabemos é polas denuncias de tal xeito que o Balance de Criminalidade do Ministerio de Interior rexistra para o último ano completo 44 denuncias por violación con penetración en Galiza e 415 por outros delitos sexuais”.

“Cos feitos denunciados na man, sen pensar en cantos quedan en silencio, temos case unha violación á semana e máis dunha agresión sexual ao día”, sintetizou, ao tempo que subliñaba a urxencia de avaliar se os protocolos funcionan para a violencia sexual e se esta é abordada de forma integral.

Presas fixo referencia a ámbitos sensíbeis, como as forzas do Estado, o ámbito xudicial e o ámbito da sanidade, e advertiu que non se está actuar “de forma correcta na sensibilización social”, polo que pide a Xunta que centre o seu labor en  contribuír a manter na sociedade o debate aberto sobre o consentimento e contribúa tamén a romper tópicos. Por exemplo, “máis dun 80% das violacións son cometidas por parella, coñecidos ou familiares”, argumentou.

“O foco sobre a violencia sexual é un reto inmediato diante do que a Xunta nin ten desenvolto a Lei galega de violencia, nin está a aproveitar a aprendizaxe desta década, nin os avance dos debates na rúa. Se teñen vontade de facer autocrítica, aquí estaremos con propostas e responsabilidade”, concluíu Presas.

A eurodeputada do BNG, Ana Miranda, manifestou o apoio do Bloque ás demandas da asociación ambiental Petón do Lobo (integrada en Vida e Ría) para que a Comisión Europea vele polo cumprimento da normativa comunitaria a respecto da industrias mineiras en Galiza e en concreto da explotación San Finx. Precisamente a presidenta da Comisión de Peticións recoñeceu que grazas ao Bloque esta denuncia foi tratada na sesión de hoxe, xa que a intención inicial era pechala.

“Non podemos permitir poñer en risco a actividade produtiva da ría de Noia pola pasividade das administracións, que nin controlan os vertidos nin o impacto ambiental da explotación mineira”, salientou Ana Miranda na súa intervención durante a Comisión de Peticións sobre a situación da mina de wolframio de San Finx en Lousame, que se ben iniciou a súa produción en 1887, na actualidade é intermitente desde o ano 2009.

O colectivo Petón do Lobo, presente hoxe en Bruxelas a través de José Manuel Romarís (secretario de Plademar, integrada tamén en Vida e Ría) , denuncia a contaminación na ría de Noia provocada por esta mina, debido aos vertidos de augas ácidas con altos niveis de metais pesados, como cadmio, cobre e zinc moi por riba dos niveles legais permitidos pola Directiva 2000/60 da Auga e o abandono constante dos residuos.

Para o BNG resulta inadmisible non só a existencia de vertidos, senón que estes se produzan a 7 quilómetros dos bancos de marisqueo, nunha zona catalogada como Lugar de Importancia Comunitaria (LIC). En concreto, no caso do cadmio, un metal pesado canceríxeno, eses niveis superan en 16 veces o nivel máximo legal permitido e en 93 a cantidade admisible en promedio anual.

Niveis de metais pesados excesivos

Segundo diversos análises, os niveis de metais pesados nos sedimentos da ría de Noia, en especial no Esteiro de Traba, son significativamente superiores aos do resto das rias galegas. “É necesario poñer fin a esta situación, porque de continuar así chegaremos a un punto de non retorno”, advirte Ana Miranda.

O cambio de titularidade en 2008 das concesións do grupo mineiro á empresa Incremento Grupo Inversor SL. non mellorou a situación. Pola contra, o proxecto de restauración non foi sometido a avaliación ambiental nin foi permitida a participación pública, polo que o problema da contaminación por metais pesados persiste. Ademais, o proxecto de explotación non contempla ningunha medida para o tratamento das augas ácidas procedentes das galerías de desagüe e a escombrera.

Ademais, a asociación formulou diversas preguntas á Comisión Europea co obxectivo de coñecer o uso dos fondos europeos destinados a este proxecto mineiro, o impacto ambiental nas zonas de produción de marisco e a falta de cumprimento das directivas relacionadas co impacto ambiental e os residuos.

José Manuel Romarís, indicou, por outra banda, que xa é longo o percorrido das denuncias presentadas para modificar esta situación. De feito, as corporacións municipais de Noia, Outes e Muros xa adoptaron sucesivos acordos plenarios rexeitando a autorización para realizar vertidos de augas residuais da mina solicitada pola empresa. Igualmente no 2017, a Deputación de A Coruña reclamou de forma unánime á Xunta que realizase unha avaliación da situación das presas mineiras existentes.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies