SUNDAY 24 FEBRUARY 2019

A portavoz nacional, Ana Pontón, utilizou a sesión de control para reclamar ao xefe do Executivo que deixe a estratexia do escapismo e exerza como presidente para defender a sanidade pública e rectificar a política de recortes e privatizacións que ten a profesionais e cidadanía en pé de guerra.

Pontón parabenizou a Feixóo por pedir agora a supresión da taxa de reposición,  coincidindo co cambio de inquilino na Moncloa, pero pídelle que faga a súa parte para dotar de persoal necesario o sistema público de saúde.

“Recorre ao travestismo político aproveitando o cambio de Goberno no Estado e pide  que se suprima a taxa de reposición que estivo bendicindo mentres gobernou Raxoi. Benvido!”, ironizou. “Ao BNG non ten que convencernos porque levamos dez anos con esa reclamación, pero se quere ter a máis mínima credibilidade empece por facer os seus deberes e convocar as 6.067 prazas vacantes que existen no Sergas. Por unha vez deixe de tirar balóns fóra, como un xogador tramposo, e goberne”, reclamou.

Á convocatoria das prazas vacantes, suma a petición dun contrato estable real, en contraposición co anunciado polo SERGAS amplamente rexeitado polos profesionais.

“Ofreza condicións de traballo dignas para recuperar a todo o persoal que expulsou a base de precariedade”, propuxo Pontón, quen cualificou de “broma” o suposto contrato de estabilidade ofrecido pola Xunta “que lle permite obrigar aos facultativos a facer xornadas continuadas de 31 horas, que clase de atención sanitaria pode darse nesas condicións?”, interpelou.

Máis persoal e máis recursos constitúen “o binomio” para blindar a sanidade pública, por iso ademais da cobertura das 6.067 vacantes no SERGAS, o BNG propón un plan de choque para dotar de 200 M€ adicionais en 2019 á atención primaria, a máis damnificada polos recortes, e recuperar as xerencias con recursos e capacidade de xestión.

Datos falsos sobre persoal sanitario

Pontón acusou a Feixóo de mentir cando asegura que hoxe hai máis persoal no sistema público de saúde.

“Ten que explicarnos de onde saca os seus datos, porque as memorias dos orzamentos indican que desde que goberna hai 1.421 profesionais menos na sanidade e, lonxe de rectificar a tendencia, os orzamentos en persoal deste ano recollen 505 profesionais menos só en atención primaria. Deixe de enganar á xente, con menos, faise menos”, denunciou citando os datos que figuran nos anexos de persoal do SERGAS.

Si a supresión da taxa de reposición, si a convocatoria extraordinaria de prazas MIR, pero Pontón tamén pediu concreción ao xefe do Executivo: cantas prazas MIR en concreto pide o Goberno galego e cantas prazas habilitada para dar esa formación ten o SERGAS. Ambas quedaron sen resposta.

Recoñecemento profesionais

A líder nacionalista aproveitou a súa intervención para volver facer un recoñemento ao persoal sanitario.

“Sen a súa dedicación as consecuencias dos recortes e das privatizacións terían sido aínda máis graves”, e fixeron de “barreira de contención” fronte a un Feixóo “convertido nun terminator para a sanidade pública, empeñado en facer da saúde un negocio para as súas empresas amigas. Só hai que ver o que está pasando con Povisa ou fundacións do entorno de Romai Beccaría.

Pontón recriminou a “prepotencia” do presidente da Xunta que fiel ao seu estilo responde “con inxurias e con mentiras” a quen defende a sanidade pública. Fronte ao mantra oficial de que a sanidade está mellor que nunca, contrapón a realidade da mobilización social e profesional.

Dimisión de 26 xefes e xefas de servizo de atención primaria en Vigo, urxencias do CHUS en indefinida desde hai 11 semanas, PACs en pé de guerra, o transporte sanitario urxente anuncia folga para febreiro, paros en atención primaria previstos en todo o país e as rúas desbordan cada vez que hai unha convocatoria en defensa da sanidade pública. “Pode explicar porqué se todo vai tan ben”, interpelou.

“Rectifique porque só acerta cando rectifica”, reclamou, “e estamos falando nada menos que da saúde dos galegos e das galegas”.

A deputada do BNG, Montse Prado, lamentou hoxe, que o Partido popular persista “nun  discurso, que unicamente tenta xustificar a grave situación da Sanidade pública galega”. No  transcurso do debate da proposición non de lei do BNG, defendida pola propia  Prado, a nacionalista reclamou ao  Goberno galego “utilizar o 100% e dotar de persoal estable o Servizo de Urxencias do Complexo Hospitalario Universitario de Santiago de Compostela”, cuxo persoal está a secundar unha folga que alcanza as 11 semanas.

Tras a intervención da portavoz  popular, Encarna Amigo que anunciou a presentación dunha emenda ao texto do BNG, Prado reprochou  a falta de vontade política do Partido popular para  establecer un diálogo sobre a proposta do persoal do CHUS que busca aproximarse ás súas demandas e que está enriba da mesa da xerencia do centro hospitalario.

Prado insistiu na “falta de vontade negociadora” da Xerencia do  CHUS e do Sergas que está obrigando ao persoal a manter a folga porque “non está disposto a aceptar  parches”. O persoal está disposto a seguir loitando por unha sanidade pública de calidade cunha asistencia digna ás persoas doentes que entran pola porta, esa é a razón pola que rexeitan as condicións que vostedes ofrecen, unhas condicións que continúan no camiño da precarización, falta de persoal e recursos suficientes tras unha década negra de permanentes recortes.

Os e as profesionais da sanidade están dicindo basta xa de “cargar sobre o lombo dos traballadores e traballadoras” o peso dunha sanidade que vostedes están dilapidando con políticas regresivas, privatizacións e máis recortes.

Prado preguntou polas verdadeiras razóns do voto en contra do Partido popular á iniciativa nacionalista despois de afirmar a portavoz do PP que están a estudar a proposta presentada polo persoal do CHUS. Parécenos “unha burla” que o PP presente unha emenda co texto, “continuar a axilizar, na medida do posible, o proceso de negociación,” criticou a deputada do BNG quen pediu a portavoz popular un compromiso e vontade para poñerse ao lado dos traballadores e traballadoras co fin de axilizar, de maneira real o acordo. A portavoz do PP eludiu pronunciarse sobre a petición da parlamentaria nacionalista.

Prado recalcou que as demandas dos e das traballadoras do servizo de Urxencias do CHUS, “son xustas” e permiten prestar unha asistencia sanitaria “digna”. Rectificar é de sabios e o Partido popular, afirmou, “está perdendo a batalla”, os problemas son tan evidentes que chegaron á opinión pública e aos medios de comunicación e por moito que se empeñe  o goberno do PP en  tentar negar a realidade non o está a conseguir, concluíu.

O BNG pide a Xunta que cumpra a lei e se implique para salvar o Centro Galego de Bos Aires, institución centenaria referente cultural e social da emigración galega que, tras un proceso marcado polo escurantismo, está desmantelado e corre o risco de ser malvendido ante a indiferenza do Goberno de Feixóo.

A portavoz nacional, Ana Pontón, defendeu na Cámara unha proposta de rescate con tres puntos.

En primeiro lugar,  poñer en marcha un plan de viabilidade que volva incluír o centro como entidade integrada en OSPAÑA, a vía para preservar a atención médica aos socios e socias e, ao mesmo tempo, se pida a implicación do goberno arxentino para reestruturar unha débeda que se disparou precisamente tras a intervención do executivo de Mauricio Macri.

En segundo lugar, adoptar as medidas necesarias en base a Lei de patrimonio cultural e a Lei de galeguidade para salvagardar o patrimonio artístico, documental, bibliográfico e editorial da institución. Por último, declarar sitio histórico a habitación 202 do centro onde  Alfonso Daniel Rodríguez Castelao permaneceu internado até o seu pasamento en 1950.

“É unha obriga moral e legal actuar, é urxente que a Xunta asuma as súas responsabilidades para evitar unha perda que sería irreparable, tanto desde o punto de vista da asistencia social e sanitaria como do inxente patrimonio cultural da emigración galega exiliada polo Franquismo”, alegou Pontón.

A dirixente do Bloque explicou que o abandono do Goberno do PP non é a única causa detrás da situación do centro, pero foi decisiva para propiciar o seu desmantelamento.

Así, lembrou como en 2011 o Executivo de Feixóo liquidou a Fundación Galiza Saúde, que actuaba como sostén da institución, “provocando a asfixia” da entidade despois de que o candidato afín ao presidente da Xunta perdese as eleccións a presidir a centenaria institución. “Non creo nas casualidades”, sentenciou Pontón.

En paralelo, o centro galego foi expulsado de OSPAÑA (Obra Social de Españois en Arxentina) sostén á hora de prestar atención sanitaria.  “Todo isto nun proceso sen aclarar e marcado polo escurantismo onde hai 3 responsábeis directos: Alejandro López Dobarro, ex-delegado da Xunta en Arxentina; Santiago Camba, ex-secretario  de Emigración e delegado do Xunta en Arxentina e Antonio Rodríguez Miranda, actual secretario xeral de emigración”, denunciou a líder do Bloque.

Por último, a intervención nefasta do Goberno arxentino, colocando un interventor que multiplicou exponencialmente a débeda, -de 60 a 1.700 millóns de pesos-, e facilitou  a descapitalización e desmantelamento do hospital. “Máis que un interventor foi un liquidador cuxo labor é vender o centro”, sintetizou Pontón.

“Con votade política é posible reflotar o Centro Galego de Bos Aires e poñer transparencia onde hai escuridade, paralizar a venda do hospital dirixíndose ás autoridades arxentina, preservar o patrimonio artístico e cultural da emigración galega e buscar solucións de futuro”, sintetizou Pontón. Nesa dirección ían as propostas do BNG, todas vetados polo PP.

O voceiro de En Marea, Luís Villares, centrou a súa pregunta ao presidente da Xunta de Galicia, Alberto Núñez Feijóo, na sesión de control no Parlamento de Galicia nos recortes continuados de dereitos por parte do seu goberno.
Na súa intervención Villares fixo referencia as distintas mobilizacións en defensa da atención primaria que sacaron á rúa 80.000 persoas en Vigo, 10.000 en Compostela e infinidade de concentracións por todo o país denunciando a ausencia de pediatras e a falla de persoal sanitario.

“Despois de negar o problema durante anos, a xunta comezou a rectificar recoñecendo que si existe un problema, aínda que se se nega a escoitar a profesionais e pacientes na procura dunha solución” lamentou Villares quen sinalou que a razón pola que continúan as mobilizacións non é outra que a continuidade dos seus recortes en sanidade. O voceiro de En Marea insistiu en denunciar a situación de maltrato sanitario imposto polo PP en Galicia que asegurou “non é casual nin torpe” e “obedece a unha intención de facer negocio cos recursos públicos que deberían ser destinados á saúde da xente”. “Recortar deteriora o servizo público e expulsa á privada. Privatizar é un roubo de recursos públicos para que as empresas privadas obteñan beneficio dun diñeiro que debera ser de todos” engadiu.

Estes recortes en sanidade como afirmou Luís Villares ven acompañado do recorte de dereitos de libre expresión e “por iso se suceden as condenas á xunta por vulneración do dereito de folga no ámbito sanitario”.

“De pouco vale a este goberno disfrazarse de centrista e liberal cando os seus actos o revelan como malicioso e amordazador de liberdades públicas. Será por iso que lle custou tan pouco parabenizar o tridente reaccionario que asoma por Sevilla,  no que brillan unhas púas que pinchan as liberdades públicas, os dereitos das mulleres, o autogoberno e con iso a democracia” declarou Luís Villares.

O voceiro de En Marea denunciou o intento por parte do Goberno galego de reprimir, impedir e facer invisibles as críticas da cidadanía ás súas políticas e por este motivo impoñen uns servizos mínimos abusivos. “A conducta da Xunta é maliciosa” sentenciou Villares explicando que “non é unha empresa de En Marea, senón do Tribunal Superior de Xustiza d Galicia que nunha recente sentenza os acusa de comportamento malicioso por xerar un retraso inxustificado na fixación de servizos mínimos para que os traballadores e traballadoras non puidesen recorrelo”. “Son vostedes campións do maltrato ás liberdades públicas con condenas en firme en persoal do 061, de atención telefónica 061, persoal sanitario do CHUOU ou pola Folga 8M”. “Debe dar explicacións por este recorte de liberdades, por este maltrato á liberdade de expresión do seu goberno” esixiu o voceiro de En Marea.

“Unha das moitas herdanzas que deixou o franquismo é a cultura do pelotazo como o fomento da actividade económica non como creación de riqueza, senón como simple extracción dela”. Así arrancou o vicevoceiro de En Marea no Parlamento, Antón Sánchez, a defensa da proposición non de lei presentada polo seu grupo en relación ao proxecto deportivo e comercial que se pretende executar no concello de Mos, “un exemplo do modelo especulador e depredador que nos levou a unha das peores crisis do século”. Antón Sánchez denunciou que “non se trata de producir riqueza senón extraela, de quedar coa riqueza uns poucos, utilizando as administracións públicas co fin do beneficio privado”. “O importante é dar o pelotazo, o que menos importa son as prioridades da xente, a racionalidade, a sustentabilidade” lamentou o vicevoceiro.

O que se pretenden como explicou Sánchez é modificar o PXOM de Mos, aprobado definitivamente a principios de 2017, para recalificar 869.000 m². A maioría desta superficie solo de protección  forestal, e a metade montes veciñais en man común, con instrumentos de ordenación aprobados. “Resulta que onde as comunidades funcionan vostedes tamén os queren expulsar para darlle entrada ao negocio especulativo” denunciou Antón Sánchez “porque este caso non se trata de fomento do deporte, trátase de negocio”. Ademais das instalacións deportivas, prevense 142.000 m² de superficie comercial en planta, segundo indicado polos promotores “para garantir a viabilidade económica da área dotacional deportiva”. “Nin se disimula. Os terreos expropiados a unha comunidades que funcionan mantendo unha actividade sostible, segundo os ideólogos desta operación deben de servir, previamente recalificados polo concello e a Xunta, para pagarlle o negocio ao señor Mouriño” lamentou.

Esta operación afectaría gravemente, segundo o grupo de En Marea no Parlamento, a nivel paisaxístico, ambiental, de mobilidade ao abastecemento ou ao pequeno comercio. A afección á paisaxe xa advertida polo Instituto de Estudos do Territorio. A nivel ambiental porque deforestaríase unha enorme superficie, forestación que contribúe ao mantemento do solo e ao mantemento dunha atmosfera respirable. Un proxecto que levaría ademais, segundo o estudo dos promotores, a entre 8 e 12.000 vehículos diarios á zona, nunha zona xa cun tráfico xa moi denso e que é xa un problema no concello, dos cales só o 5 ou 8 por cento chegarían motivadas pola zona comercial e 92 ou 95 por cento.
Por último,  o vicevoceiro de En Marea no Parlamento defendeu que non sería serio acometer a implantación de 142.000m2 de superficie comercial sen sustentarse nun estudo que fose moito máis amplo que só o concello de Mos, “o que seguramente nos levaría a concluír que é un desatino facelo”.

“O miolo destas operacións son as plusvalías acadadas pola recalificación” asegurou Antón Sánchez quen salientou que se pretende facer isto contra da opinión da comunidade de montes de Tameiga, contra as comunidades de augas da zona xestores responsables do territorio e da auga durante tantos anos.

“Este proxecto non se xustifica nin dende o punto de vista do interese xeral, nin a racionalidade, nin da sustentabilidade. Só se xustifica dende o punto de vista de favorecer o negocio privado dende as institucións públicas” declarou Sánchez. Neste sentido asegurou que “o goberno galego ensinou a patita na Lei de acompañamento tentando colar pola porta de atrás un mecanismo de expropiación que permitise ao propio promotor privado xestionar dita expropiación” pero “recuraron porque os pillamos nas patacas”. “Ensinaron a patita como a ensina a súa alcaldesa en Mos” engadiu.

Por este motivo, o grupo de En Marea no Parlamento presentou unha proposición de lei no pleno do Parlamento no que se pide que a Xunta non aprobe a modificación puntual do planeamento do Concello de Mos coa que se pretende facilitar a realización do proxecto deportivo e comercial. Pola súa contra pídese potenciar o pequeno e mediano comercio e a súa conservación e expansión, manter os terreos coa vocación forestal e de lecer para que funcionalmente faga parte do pulmón verde de Vigo, Mos e a súa área metropolitana, aprobar e publicar a estratexia para a execución da Infraestrutura Verde de Galicia, e por último, aprobar as directrices da paisaxe.

O grupo parlamentario de En Marea ven de presentar unha moción no Parlamento de Galicia para a creación de puntos de información enerxética estable nos concellos ante a falla de información suficiente da cidadanía sobre as tarifas da luz e a falla de acción por parte da Xunta de Galicia ao respecto. Unha falla de información que como sinalou o deputado de En Marea no Parlamento de Galicia, Francisco Casal, “supón un traslado ilexítimo de rendas dos fogares cara ás eléctricas que podería superar os 200 millóns de euros ao ano en Galicia”. “É o mais grave é que podería correxirse dunha maneira bastante sinxela e cuns orzamentos moi contidos” denunciou.

A evidencia da ineficacia das accións da Xunta “é palmaria” analizando os datos segundo Francisco Casal. Para xustificar esta afirmación explicou que o mercado  regulado é sen discusión o mais ventaxoso para os fogares e aínda así case 150.000 ao ano en Galicia estanse a pasar ao mercado libre, moitos deles sen sabelo. “Isto prodúcese polas campañas masivas das comercializadoras, que non teñen contraposición por parte da administración” asegurou. Así mesmo a discriminación horaria é a tarifa mais vantaxosa, pero en Galicia só a teñen un 6 por cento dos fogares, contra o 94 por cento dos fogares en Alemania. O motivo é que as comercializadoras eléctricas non teñen interese en que a xente se decate de que a discriminación horaria beneficiaría a máis do 95  por cento dos fogares. Referiuse tamén do Bono Social que en Galicia so chega a 9.678 usuarios pese a existir 24.092 familias numerosas e pese a que os trámites para conseguilo son moi sinxelos.

“Isto demostra que a ausencia de información dos consumidores galegos de electricidade e unha realidade evidente, aínda que o Goberno Galego segue a negala, rexeitando todas as iniciativas deste grupo para desenvolver campañas e iniciativas cunha intensidade e dotación orzamentaria proporcional ao problema e garantir que se lle da solución” declarou Francisco Casal.

Ante a insuficiente actuación do Goberno da Xunta, En Marea puxo en marcha unha campaña informativa por todo o País e que permitiu descubrir que as campañas do Goberno galego non acadaron os seus obxectivos xa que o 80 por cento das persoas que acoden as charlas informativas descoñecen que contrato e tarifa teñen nos seus fogares, o 90 por cento descoñecen se están abonados ao mercado regulado ou ao mercado libre, o 80 por cento descoñecen as vantaxas de ter contratada a tarifa de discriminación horaria, e case 100 por cen das persoas descoñecen se a potencia contratada é a adecuada para o seu fogar, aceptando a que a compañía comercializadora lles propoñe.

Aínda que as medidas mais importantes para baixar o recibo da luz van moito mais alá de ter a potencia e a tarifa adecuada, En Marea presentou diversas actuacións nese senso e que facelo pode supoñer aforros importantes ao ano para case todos os consumidores. Así, para un consumidor medio estar no mercado regulado no canto do libre supón un aforro de entre 6 e 9 euros ao mes. Estar na discriminación horaria supón un aforro de entre 10 e 40 euros, esta última cifra para os que teñen calefacción eléctrica, de aforro mensual.

“A falta de información sobre os contratos e as tarifas domésticas de electricidade mais adecuadas teñen un custo para todos os fogares galegos de entre 125 e 213 M€ ao ano. Cartos arrebatados de xeito ilexítimo dos petos das cidadás e cidadáns que acaban en beneficios das eléctricas ante a pasividade da Xunta que non fai o necesario para que esteamos informados suficientemente” insistiu Francisco Casal.

Para arranxar esta situación, o grupo de En Marea presentou unha moción no pleno do Parlamento na que se insta á Xunta a adoptar as seguintes medidas:

1.- Crear Puntos de Información Enerxética estables en todos os Concellos de mais de 15.000 habitantes. Dotados de toda a información necesaria e persoal especializado para asesorar a toda a cidadanía en asuntos como: as tarifas eléctricas e de gas mais vantaxosas; hábitos no fogar para rebaixar o consumo enerxético; medidas para incrementar a eficiencia enerxética; alternativas para o autoconsumo eléctrico; asesoramento e tramitación do Bono Social Eléctrico e de calefacción; alternativas enerxéticas a partir da biomasa, xeotermia, etc.

2.- Nos Concellos de menos de 15.000 habitantes garántese que haxa como mínimo un Punto de Información Enerxética por Comarca.

3.- Dotar de orzamento por parte da Consellería de Economía, Emprego e Industria o acordo coa FEGAMP para a implantación dos Puntos de Información Enerxética.

4.- Desenvolver a través do Instituto Galego de Consumo campañas informativas nos medios de comunicación públicos e privados para que a poboación coñeza as vantaxes do mercado regulado da electricidade, da tarifa de discriminación horaria e de ter contratada a potencia axeitada en cada fogar.

5.- Instar ao Ministerio de Industria e Turismo a cambiar os tramos regulados de potencia contratada de electricidade, establecéndoos en tramos de 0,2 kilowatios.

6.- Regular legalmente, dentro das súas competencias en materia de consumo, que as compañías comercializadoras de electricidade e de gas, no que lles pode afectar,  informen claramente aos seus abonados a través dos recibos de:

  1. Se están no mercado regulado ou libre e as súas implicacións: perda do dereito ao Bono Social; perda das garantías contra os cortes de subministro; etc.
  2. Cálculo exacto do importe que aboarían no recibo en caso de estar en discriminación horaria e potencia máxima consumida en cada período de facturación

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies