SATURDAY 20 APRIL 2019

Archivos de Autor: admin

A eurodeputada Ana Miranda leva o Parlamento Europeo a contaminación do encoro do río Umia

A eurodeputada do BNG, Ana Miranda, vén de presentar unha pregunta á Comisión Europea sobre a contaminación do encoro de A Baxe, no río Umia, causada pola presenza continuada e en altos niveis da bacteria Microcystis. “É imprescindible facer controis rigorosos das augas e poñer fin a esta situación que se vive permanente en Caldas e Reis, tal e como vén denunciando desde hai anos o BNG”, afirma a eurodeputada.

A presenza desa cianobacterias no embalse do Umia é unha constante nesta zona desde hai anos. Ademais de tinguir a auga de verde, ten provocado o colapso do sistema de depuración da ETAP de Caldas, como en 2010, causando graves problemas de abastecemento de auga á poboación. Nese ano, a mediados de setembro, superáronse os 2,4 millóns de células e o nivel de clorofila alcanzou os 342 microgramos por litro.

Neste mesmo verán de 2018, os datos mostraban que a alga pasara das 84.250 células por mililitro de auga o 2 de xullo a 28.750 o 9 de xullo. “Estamos ante unha grave situación que se repite continuamente e que loxicamente preocupa á veciñanza da zona”, manifesta Miranda, quen alerta de que se aumenta a presenza da alga, o subministro e a potabilidade da auga non está garantida.

Precisamente a Organización Mundial da Saúde (OMS) considera que estar en contacto con esas augas contaminadas polas cianobacterias pode provocar doenzas gastrointestinais, como náuseas, vómitos, diarrea e febre; así como infeccións de ollos, ouvido e gorxa. Incluso nos casos máis graves pode darse problemas hepáticos ou de fígado.

Desmantelamento do encoro

Pola súa banda, dende o BNG de Caldas, o seu portavoz Manuel Fariña explica que os afloramentos de cianobacterias prodúcense “pola confluencia de varios factores”, como son o encoramento das augas, o aumento das horas de luz e a subida das temperaturas. “É evidente que sobre o único que podemos actuar é sobre o encoramento, xa que sen encoro non hai cianobacterias”, suliña.

Neste sentido, Fariña salienta que o BNG comparte a opinión de expertos como o doutor Fernando Cobo, “quen afirma publicamente que mentres haxa encoro haberá microcistina, polo que avogamos polo desmantelamento da presa e a recuperación integral do Umia”. Ao seu xuízo, “non se pode aceptar que a contaminación sexa o normal”.

En Marea insta á Xunta a acometer a necesaria ampliación do centro de saúde do Porriño

En Marea insta á Xunta de Galicia a acometer dunha vez por todas a necesaria ampliación do centro de saúde do Porriño e a garantir unha dotación de persoal e medios suficiente para cubrir as necesidades asistenciais de todos os municipios aos que presta servizo. Así o reclamou este mércores no Parlamento de Galicia, onde a deputada Eva Solla defendeu unha iniciativa coa que tamén denunciou a non cobertura das baixas e vacacións.

A ampliación do centro de saúde do Porriño é unha demanda histórica. Xa en 2010 o Concello puxo a disposición unha parcela de 525 metros cadrados e asinou un acordo coa Xunta de Galicia, que incluía a creación dun servizo de fisioterapia e outro de radioloxía. Porén, case unha década despois a situación non mudou, os terreos fican baldíos e de novo o goberno galego non inclúe no seu orzamento para o vindeiro ano a partida para impulsar esa infraestrutura nin para mellorar a Unidade de Atención ás Drogodependencias. Dúas medidas aprobadas por unanimidade no pleno do Concello do Porriño.

Tal e como lembra a deputada Eva Solla, os pediatras soportan unha elevada carga de traballo, e o espazo para urxencias e rehabilitación dispoñible tamén é insuficiente. Ademais, o número de pacientes potenciais tense incrementado nos últimos anos ata superar os 40.000. Unha carga asistencial que se agrava no caso do PAC, que tamén dá cobertura a outros municipios da contorna, como Mos ou Salceda de Caselas.

Eva Solla lembra a nova concentración convocada para este xoves no Porriño, onde a veciñanza volverá reclamar que se acometa a ampliación pendente. E insta ao goberno galego a dotar este e o conxunto dos PACs galegos de persoal suficiente e a cubrir baixas e vacacións. “Non pode ser que reiteradamente o goberno non habilite as partidas precisas para cubrir as necesidades en materia sanitaria”, indica a deputada, que lamenta que o goberno galego desoa de xeito reiterado as peticións e permaneza impasible ante as carencias.

Esa liña, a deputada lembra que o déficit de medios e persoal que afecta ao PAC da localidade é un problema que se extende ao conxunto dos puntos de atención continuada de Galicia, cuxo persoal está a mobilizarse. “Lonxe de buscar solucións ás carencias dos PACs, que na súa maioría traballan con dotacións de persoal moi por debaixo das necesidades, a Xunta propón unha solución que atenta contra os dereitos dos traballadores”, denuncia Eva Solla.

“Os profesionais piden un plan de continxencias que permita cubrir as ausencias imprevistas cun modelo análogo ao que funciona no 061. Algo que non se fixo. Lonxe diso, agora a Xunta pretende obrigar ao persoal a figurar nunha listaxe sen ningún tipo de contrapartida, violando o seu dereito á conciliación e forzándoos a incrementar a súa xornada laboral”. Unha solución inaceptable.

Ana Miranda reclama maior control dos fondos europeos con procesos de investigación máis rápidos e claros

A eurodeputada do BNG, Ana Miranda, e membro da Comisión de Asuntos Xurídicos, vén de presentar unha batería de emendas ao Informe sobre as Investigacións levadas a cabo pola Oficina Europea Anti-Fraude (OLAF) no tocante á cooperación coa Oficina do Fiscal Europeo (EPPO) e á efectividade desas pesquisas.

“O control dos fondos europeos de forma máis transparente e rápida nos procesos é fundamental”, salienta Ana Miranda, quen lembra o acontecido en 2003 e 2004 coa adxudicación de 104 depuradoras compactas para a súa instalación en pequenos núcleos de poboación . “É terrible que unha sentenza considerase que a investigación arrancara cando as presuntas irregularidades xa estaban prescritas e a Deputación de Ourense librouse de devolver 10,1 millóns de euros reclamados polo Estado, atendendo aos requirimentos da OLAF”, sinala.

Para o BNG é fundamental a posta en marcha de “accións concretas” para materializar a cooperación entre a OLAF e o Fiscal Europeo mediante o aumento das reunións periódicas para trataren investigacións en curso e identificar tendencias e posíbeis vencellos entre casos diferentes. Asemade na batería de emendas presentadas, a deputada nacionalista defende que a intensificación das pesquisas relativas ao mal uso dos fondos europeos debe facerse baixo o Marco Financeiro Multianual.

Notificación inmediata

Por outro lado, Ana Miranda considera que debe ser reforzado o papel do Fiscal para axilizar as investigacións, así como a notificación inmediata das condutas delitivas por parte da Oficina Anti-Fraude nas que a EPPO teña competencias. Finalmente, a eurodeputada do Bloque propón que as persoas que denuncien delitos e violacións relativas aos intereses financeiros da UE tanto á OLAF como á EPPO gocen de protección total.

“Se queremos que xornalistas e investigadores sigan investigando e destapando os casos de corrupción temos que garantir a súa seguridade”, destaca Miranda, para quen resulta intolerable que en Europa se produzan asasinatos como o de Dafne Caruana, acontecido en Malta en outubro de 2017, tras participar na investigación dos “Panama Papers”.

O BNG logra o apoio do Parlamento para pedir ao Goberno central a supresión da taxa de reposición na sanidade

O BNG logrou o apoio do resto dos grupos da Cámara para solicitar ao Goberno central que suprima a taxa de reposición imposta polo Executivo de Raxoi en 2010 e que, só no caso da sanidade galega, implicou a desaparición de un mínimo de 1.791 prazas.

En concreto, o acordo consensuado pola portavoz de Sanidade, Montse Prado, recolle que o Parlamento de Galiza “insta ao Goberno español á eliminación, como norma de carácter básico, da taxa de reposición de efectivos na Lei estatal de orzamentos de 2019, correspondendo a cada comunidade autónoma a competencia de determinar o número de prazas a incluír na oferta anual de emprego público”.

A formación nacionalista trasladaba un demanda presentada pola CIG, “petición que nos parece moi razoable e que o BNG fai súa: Eliminar a taxa de reposición imposta en 2010 polo Goberno central responsable do déficit de profesionais e, por tanto, responsable dunha situación na que faltan efectivos no sistema público de saúde”, indicou.

Prado destacou que a taxa de reposición “impide que se incorporen novos profesionais para cubrir as prazas necesarias”, de feito, entre os período 2010-2014 só se repuxeron o 10% das vacantes que se produciron no sistema público de saúde, en 2015 a taxa de reposición impediu cubrir a metade das prazas que se perderan nese exercicio e no bienio 2016-2017 foi posible repoñer as prazas na súa totalidade pero só nestes dous anos. “Polo tanto, queda moito emprego que recuperar na sanidade pública”, explicou Prado, como mínimo 1.791 prazas.

A modo de exemplos, a deputada nacionalista citou as 81 prazas no servizo de matronas, as 726 de enfermeiros e enfermeiras, as 682 en técnic@s en coidados auxiliares ou o déficit de 93 prazas de pediatras en atención primaria

Ana Pontón propón aplicar a Lei da Dependencia ás persoas maiores da emigración que non teñen medios

A portavoz nacional, Ana Pontón, e a eurodeputada, Ana Miranda, escoitaron as necesidades da colectividade galega en Montevideo onde se reuniron coa directiva do Centro Galego da capital Uruguaia e co consello de residentes, en particular a situación de precariedade social na que se atopan moitos galegos e galegos maiores que non dispoñen de recursos suficientes.

A líder do BNG comprometeuse a levar ao Parlamento galego a proposta de que se aplique a Lei de Dependencia a aquelas persoas da diáspora que perciben pensións ínfimas e sen dereito a cobertura social, mesmo en situacións persoais de dependencia.

“A demanda que nos trasladan e que se aplique a Lei da Dependencia para os residentes ausentes. Consideramos que é unha cuestión de xustiza social e que non debemos deixar abandonadas aos galegos e ás galegas na diáspora que, nos últimos anos da súa vida, necesitan unha axuda”, salientou Pontón tras o seu encontro no Centro Galego de Montevideo, institución creada en 1879 polos milleiros de persoas que ao longo do século XIX e principios do século XX emigraron a este país americano en busca dunha vida mellor.

Nese sentido, Pontón avanzou que o BNG presentará propostas no Parlamento “para que os maiores residentes no exterior que carezan de medios suficientes podan ser receptores de axudas ao amparo da Lei de Dependencia, non se pode deixar atrás as persoas que emigraron e están en situación de vulnerabilidade”, recalcou.

A demanda de recoñecemento pleno da nacionalidade foi outra das cuestións que a colectividade da diáspora uruguaia trasladou a delegación do Bloque, que dentro dos seus contactos institucionais mantivo un encontro coa vicepresidenta de Uruguai, Lucía Topolansky, con quen intercambiaron ideas e compartiron análise da situación internacional.

“Para o BNG é moi interesante a experiencia do Goberno do Frente Amplio porque foi capaz de transformar a sociedade de Uruguai en positivo cara unha maior igualdade e xustiza social, e a súas políticas supuxeron unha mellora na calidade de vida das maiorías sociais”, salientou Pontón.

No encontro coa vicepresidenta destacaron “os importantes vínculos entre Uruguai e Galiza”, e a necesidade de sumar forzas para combater a ola de involución que ameaza os dereitos e as conquistas sociais que tanto costou lograr.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies