WEDNESDAY 16 JANUARY 2019

Archivos de Autor: admin

En Marea volve a pedir no Parlamento un cronograma de actuacións para a mellora integral do Porto de Tupide, as condicións de calado, abrigo e seguridade

O pasado mes de maio aprobábase por unanimidade no Parlamento de Galicia a iniciativa de En Marea na que se instaba á Xunta de Galicia a acometer de inmediato a dragaxe do porto de Tupide. Así mesmo, o grupo de En Marea consideraba necesario que a Consellería do Mar presentase un proxecto, acompañado de cronogroma e partidas orzamentarias, para acometer melloras integrais de calado e abrigo en dito peirado xa que o chamado “Porto Chico”, ademais da dragaxe, precisa un cambio na súa configuración, para mellorar as condicións de abrigo e de seguridade.

A realidade do Porto Chico, ou peirao de Tupide, en Foz, que sirve de porto deportivo, orixina múltiples prexuízos, pois as embarcacións instaladas no mesmo, que pagan as correspondentes taxas polo atraque, sofren estragos durante os temporais, optando mesmo por subir a terra as lanchas ou trasladalas ao porto pesqueiro como lembrou a deputada Paula Vázquez Verao.

Cómpre lembrar que a Asociación A Ribeira de Foz ten presentado ante a Consellería do Mar unha proposta de actuacións de mellora do Porto Chico, consistente en modificar o espigón, de xeito que, ademais, melloraría a seguridade da praia de Tupide, pois actualmente as embarcacións acceden ao porto por diante da praia, con situacións de perigo para bañistas.

O dragado dos fondos mariños foi realizado en conxunto e aumentáronse 40 prazas de amarre en Tupide, pero falta cumprir o compromiso da Consellería do Mar con respecto a facer os estudos necesarios para acometer melloras integrais no porto de Tupide: dragado do propio porto e melloras de abrigo, modificando o espigón. Ademais, nunha resposta a unha pregunta rexistrada por En Marea no Parlamento de Galicia, a Consellería asegurou que estas 40 prazas son suficientes, cando a falta de prazas de amarre continúa sendo un problema en toda a Mariña.

Dende En Marea amosaron a súa preocupación por que a Consellería non teña en conta a proposta integral de mellora do porto de Tupide, pois nas respostas que nos ten trasladado a preguntas realizadas no Parlamento (a última delas respondida neste mes de outubro) non se pronuncia especificamente sobre a proposta que a Asociación A Ribeira de Foz lle ten remitido con melloras para dito peirao.

Por este motivo, o grupo de En Marea ven de rexistrar unha petición á Xunta para que traslade un cronograma de actuacións para a mellora integral do Porto de Tupide, das súas condicións de calado, abrigo e seguridade.

En Marea lamenta que fronte o PIB de máximos históricos de Galicia a Xunta presente un orzamento de “mínimos históricos”

Desde o grupo parlamentario de En Marea lamentan unha vez máis que Núñez Feijóo e seu goberno opten por continuar cun orzamento lesivo contra os intereses da maioría social mentres que o Produto Interior Bruto (PIB) do noso país está en máximos históricos. Fronte a isto, a porcentaxe do orzamento presentado pola Xunta de Galicia para 2019, está en mínimos históricos o que impide mellorar os servizos e incentivar a economía.

En Marea denuncia que o orzamento 2019 contén unha rebaixa de 2.412.171.740 de euros en termos reais, sobre o orzamento do 2009, polo que compre un incremento mínimo de 400.000.000 de euros nun plan plurianual que permita recuperar o nivel de investimento publico do 2009.

En relación ao gasto sobre o PIB, este orzamento contempla a maior baixada deste porcentaxe en toda a serie histórica dende 2009 en sectores concretos como na Sanidade cun 5,72 por cento de gasto sobre o PIB fronte ao 6,02 por cento do 2009. 0 mesmo acontece na Educación onde sitúase en 3,56 por cento fronte ao 3,84 por cento do 2009 sendo tamén o peor dato da serie histórica.

Nos dous ámbitos de maior responsabilidade de competencias o executivo de Feijóo prodúcese un forte incremento do recorte fronte a riqueza galega de forma absolutamente incomprensible e lesiva para a maioría social como sinalan desde En Marea.

No capítulo de impostos e recadación, En Marea insistiu en denunciar a insultante pretensión do Goberno galego de incluír a rebaixa do imposto do Patromonio para aquelas persoas que teñan máis de 700.000 euros, medida que atenta contra a propia Constitución ao impoñer un sistema de tributación regresiva en lugar de progresiva e que beneficiará unicamente aos amigos millonarios do Partido Popular.

Así mesmo, En Marea denuncia o incremento das taxas públicas, feito que obviou e obvia o Goberno galego na campaña de publicidade dos orzamentos, subidas que afectarán a sectores fundamentais no país como a pesca.

Noutro orde de asuntos, destaca o feito que na Lei de acompañamentos se recoñece un incremento dos permisos de maternidade pero unha vez máis esquece a necesidade de equiparación de permisos de maternidade e paternidade.

A Lei de acompañamento ademais introduce modificacións de enorme calado sobre as leis como a de Montes, a Modificación da Lei 3/2007, do 9 de abril, de prevención e defensa contra os incendios forestais de Galicia ou a lei de mobilidade de terras. Por este motivo, desde En Marea defenden que sería necesario optar por un mecanismo diferente a este trámite xa que impiden o debate e a participación dos conxunto do parlamento e sobre todo da cidadanía. Así, desde En Marea denuncian o“ mecanismo repetido continuamente polo Goberno galego de efectuar unha lei de acompañamentos Frankestein que afecta a un enorme corpo lexislativo do país que debería realizarse mediante outro proceso parlamentario que permitise o debate e a participación da cidadanía”.

PP, En Marea e PSOE pactan para excluír ao BNG da defensa da transferencia da AP-9

A portavoz nacional, Ana Pontón, critica o pacto entre PP, En Marea e PSOE para excluír ao BNG do debate que terá lugar proximamente no Congreso en defensa da Lei de transferencia e rescate da AP-9, aprobada pola Cámara galega en marzo de 2016, pese a ser o grupo parlamentario impulsor e redactor do texto lexislativo.

Despois de que estas tres forzas políticas rexeitaran na Xunta de portavoces o escrito de impugnación presentado polo BNG, Pontón instan a rectificar no próximo pleno.

“Para o Bloque é un tema de país e pídolles que rectifiquen no pleno do martes retirando o punto da orde do día ou ben que se chegue a un criterio lóxico e presentable en termos democráticos, que pasa por garantir que o grupo que promove unha iniciativa lexislativa integre a delegación encargada da súa defensa no Congreso”, argumentou, “o resto enturba as relacións no Parlamento pero tamén o funcionamento democrático nas institucións”.

Esta petición do BNG xurde despois de que PP, En Marea e PSOE pactasen cambiar a delegación que irá á Cámara baixa a defender a Lei de transferencia da titularidade e competencias da AP-9 aprobaba o 15 de marzo ce 2016, data na que o Parlamento tamén designou ás persoas encargadas de defender a posición de Galiza en representación do PP, PSOE e BNG.

Nomeamentos que agora se queren mudar cunha nova designación no vindeiro pleno para excluír ao BNG, “a pesar de que esas tres forzas políticas saben que o autor que impulsou, escribiu e defendeu con uñas e dentes esa lei foi o Bloque, e pensamos que é fraudulento en termos democráticos excluír ao grupo que precisamente promoveu a iniciativa”.

Nada hai no regulamento da Cámara galega que obrigue a remover estes nomeamentos para designar outros novos e tampouco se sostén o argumento da aritmética parlamentaria porque, nese caso, o PP podería designar dous dos tres representantes.

E todo isto nun contexto no que as forzas estatais levan anos vetando a transferencia da AP-9 e agora queren evitar que esa infraestrutura non só sexa xestionada desde Galiza senón tamén conseguir que recupere a titularidade pública e deixe de ser pasto da especulación por parte de fondos voitres que fan caixa coa AP-9”, alegou.

Hai que ter en conta que o Parlamento ten aprobadas tres leis reclamando a transferencia da AP-9. A primeira de 2016 é a que en breve será debatida no Congreso despois de que o Goberno de Sánchez mudase o criterio respecto á tramitación da lei antes vetada polo Goberno de Raxoi. Precisamente, en aras de sortear eses vetos do PP e para evitar que quedase esquecida no caixón, aprobáronse outros dous textos, en 2017 e en 2018.

Nace a rede de plataformas Compostella-Ulla-Tambre

A Rede de plataformas pretende combater conxuntamente as agresións ao medio natural no entorno de Santiago e nas cuncas do Ulla e o Tambre.

A Rede aglutina á plataforma veciñal contra a mina de Touro-O Pino, a defensa do Sar, a loita dos afectados polo vertedoiro de Miramontes, a mobilización contra o vertedoiro de Lesta, a Plataforma en contra da instalación dunha empresa de residuos industriais na Casalonga, a preocupación pola contaminación da destilería de Rois, a repercusión nos concellos de Mesía e Frades pola actividade mineira de ERIMSA e a oposición ao megaparque eólico de Ordes.

O vindeiro luns 22 de outubro terá lugar a rolda de prensa de presentación da Rede de Plataformas de Compostela Ulla-Tambre, que centrará a súa actividade na defensa do espazo natural que conforman as cuncas dos ríos Ulla e Tambre, gravemente ameazado por diferentes proxectos empresariais que afectarían potencialmente a saúde dunha poboación que supera os 400.000 habitantes repartidos en 51 concellos.

Á Rede adhírense as diferentes plataformas que foron xurdindo nos últimos tempos na comarca de Compostela coa vocación de xuntar forzas contra a tentativa de numerosas empresas de facerse cos recursos naturais da zona botando man da desprotección que supón a nova Lei de fomento de implantación de iniciativas empresarias, o Plan de Xestión de Residuos Industriais de Galicia e da tolerancia da administración autonómica, eludindo o control real das actividades autorizadas.

Anova aposta por relanzar En Marea como ferramenta da Unidade Popular para a ruptura co Réxime do 78

Hoxe o principal organismo entre asembleas de Anova Irmandade Nacionalista expresou a súa preocupación polo momento que vive nestes momentos En Marea. Unha deriva burocrática, iniciada pola actual Coordinadora, dilúe a súa orientación política rupturista e lamina a pluralidade interna do espazo, convertendo na práctica a En Marea nunha opción de parte e non no punto de encontro da Unidade Popular en Galicia.

Vemos con especial preocupación que o debate do Plenario 27 de outubro teña o seu centro en cuestións internas, nun debate no que cuestións procedimentais e internas ocuparán a maior parte do tempo do debate en detrimento do necesario debate de ideas. Nese sentido o documento político que se presenta non defende ningunha orientación política e estratéxica clara, o que na práctica supón un cheque en branco para a dirección que salga electa neste proceso poida tomar calquera decisión nun momento decisivo no que hai que revalidar os gobernos municipais e ampliar a rede de mareas municipalistas.

Non compartimos os prazos dados para inscribirse no censo de En Marea. Se o comparamos cos prazos de procesos anteriores, recortan en case un mes o tempo para darse de alta no censo. Promoveremos, con outros axentes de En Marea, emendas que permitan ampliar estes prazos e que ninguén que o desexe quede sen poder participar. Tamén resulta sorprendente que o Consello de Mareas esixa que un organismo superior como o Plenario teña que ter unha maioría de 2/3 para introducir emendas ao Regulamento que establece o seu funcionamento.

Entendemos que tanto o Plenario como o proceso de renovación do Consello das Mareas debe supoñer un punto e aparte nesta forma de proceder. Debemos recuperar as posicións de ruptura e armar un espazo realmente respectuoso coa pluralidade como garantía máxima para blindar as mareas municipalistas e dar a batalla contra o Partido Popular.

Nese sentido facemos un chamamento ao conxunto do espazo de Unidade Popular – e moi especialmente ás mulleres e homes implicados no día a día da construción das mareas – para que podiamos conseguir estes obxectivos. Todas e todos somos necesarios para relanzar En Marea como ferramenta de ruptura co Réxime do 78.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies