SUNDAY 24 FEBRUARY 2019

Archivos por Mes: octubre 2018

En Marea critica a redución do orzamento para investigación do INTECMAR e a falta de recursos para saneamento das rías

En Marea denuncia o inaceptable recorte efectuado pola Xunta de Galicia ao orzamento para investigación do INTECMAR. E insta ao goberno galego a poñer en marcha un plan transversal que solucione as carencias de saneamento e permita acometer a recuperación integral das rías galegas. Así o expresou a deputada Paula Quinteiro logo de que a conselleira do Mar explicase no Parlamento de Galicia o orzamento dese departamento para 2019. Unhas contas continuístas e afastadas das necesidades reais, que non atenden as reclamacións dos traballadores do mar.

En Marea considera intolerable que, en lugar de fornecer recursos suficientes para coñecer as causas das mareas vermellas e aportar solucións á mortandade do marisco, a Xunta opte por recortar as partidas destinadas a investimento do INTECMAR. “É dicir a proxectos que permitan mellorar e incrementar as liñas de investigación do instituto, que pasa dos 912.000€ do 2018 aos 671.000 previstos para o vindeiro exercicio. Un recorte do 33%”.

A formación entende que o goberno galego debe realizar dunha vez unha aposta decidida pola recuperación integral das rías galegas. Nese senso, Paula Quinteiro lamentou que o orzamento de Mar non contemple recurso algún para saneamento, e instou á posta en marcha dun plan transversal neste eido. “Preocúpanos altamente a inexistencia dunha política decidida de saneamento das nosas rías, que se atopan nunha situación moi preocupante, especialmente na desembocadura dos cursos de auga. Sabemos que non é algo que dependa só da súa consellería, pero cremos que o modelo que están levando adiante é insuficiente”, indica a deputada de En Marea. Que tamén califica de burla a partida de 800.000 euros destinada a protección e recuperación da biodiversidade dos ecosistemas mariños.

En Marea denuncia ademais que o orzamento de Mar para o ano próximo non conte con partidas para sufragar os necesarios paros biolóxicos ou as consecuencias derivadas da redución de cotas. Así como o feito de que a Consellería non contemple tampouco as compensacións necesarias para adoptar medidas que permitan aos traballadores do mar obter ingresos cando non se poidan sair traballar por razóns de mal tempo. Demandas, lembra a deputada, que ten efectuado o propio sector.

Sen medios para loita contra o furtivismo
Paula Quinteiro destacou tamén o feito de que, a pesar do acordo unánime recentemente adoptado polo Parlamento de Galicia, o orzamento de Mar non contemple partida algunha para contribuir á loita contra o furtivismo e dotar de vixilancia profesional pública os areais. Non teñen aunciado nada neste sentido. E estamos falando dun acordo unánime”, destaca a deputada. Que tamén denunciou que a Consellería falsee as cifras económicas destinadas a salvamento cun incremento que, na realidade, responde a unha modificación orzamentaria. “Cremos que a suba desa partida ten a ver con unha denuncia traída a este Parlamento por parte do grupo de En Marea, xa que a operatividade e os custes deste servizo durante o 2018 foron sufragados cunha modificación orzamentaria a pesar de que o contrato levaba anos asinado”, indica Quinteiro.

Por último, a deputada quixo destacar tamén o baixo nivel de execución orzamentaria que as contas de Mar tiveron en exercicios anteriores. E instou á conselleira a ter en conta as demandas dos traballadores e a impulsar política acordes ás mesmas. “Moitas persoas tiveron que deixar a actividade nos últimos anos porque non lles garantizaba uns ingresos suficientes cos que subsistir. E moitas outras continúan traballando pero cuns ingresos de miseria”, indica Paula Quinteiro, que lle lembrou á titular de Mar o descenso do número de embarcacións ou permisos de marisqueo a pé, e lamentou un orzamento insuficiente para reverter esa realidade.

Ana Pontón: “Luís Seara é garante do cambio político que necesita a cidade Ourense paralizada polo PP”

A portavoz nacional do BNG, Ana Pontón, participou hoxe no acto público de presentación do candidato do BNG á Alcaldía de Ourense, Luís Seara do que destacou o seu compromiso para impulsar o cambio de rumbo político nunha cidade que o Partido popular conduciu á “parálise”.

Acompañados de máis de trinta cargos institucionais, militantes e simpatizantes, a portavoz nacionalista e ao candidato compareceron antes os medios de comunicación manifestando que o BNG presentase á cita electoral cun grande reto: “Deixar atrás tres anos perdidos na única cidade de Galiza sen orzamentos e cun goberno incompetente que é parte do problema e polo tanto, non pode ser parte da solución”.

Pontón recalcou que o cabeza de lista do BNG, Luís Seara e as persoas que o acompañarán na candidatura darán o impulso necesario ao concello para convertelo nun concello “vivo e dinámico”.

Estamos vivindo tempos complexos e, hoxe máis que nunca, fronte á política líquida son necesarias “organizacións cohesionadas, unidas e solventes” con principios para recuperar o verdadeiro sentido da política polo que agradeceu ao candidato “o seu grande compromiso co interese xeral”.

Tras presentar ao candidato como un político que leva a Ourense no corazón e coñece a cidade, os seus problemas e necesidades, afirmou que Seara é unha persoa “integra, traballadora e dialógante”, e que levará ao concello o dialogo que faltou durante estes anos en Ourense, caracterizados pola “arrogancia política local”.

O BNG APLICA POLÍTICA DE SERVIZO PÚBLICO NOS CONCELLOS

Para a portavoz do BNG, o Partido popular levou á parálise a Ourense durante tres anos que se converteron en “tres anos en branco”. A situación social, demográfica e anímica de Ourense, afirmou, é o mellor retrato das políticas do Partido popular así como o despoboamento, a crise económica, a falta de emprego e iniciativas para unha cidade e provincia na que o Partido popular representa “un partido corrupto, con dinastías familiares e ao que só lle interesa ter o poder”.

O PP REPRESENTA PASADO E DINASTIAS

Fronte este Partido popular que representa o pasado, “o BNG é a alternativa que entende a política como servizo público, cun proxecto para o país, e para Ourense” como xa levamos demostrado en Allariz, en Castrelo, na Mezquita, en Barbadás, Verín, Viana ou Baños de Molgas. “Un proxecto que mellora a vida dos concellos e para construír un país mellor”. Conseguímolo noutros lugares e tamén queremos facelo en Ourense porque queremos ser “o motor dese cambio”. No BNG aprendimos “dos acertos e dos erros” e queremos un Ourense que reforce a nosa autoestima como galegos e galegas, “un Ourense comprometido coa xestión pública, no que sexa erradicado calquera tipo de favoritismo, un Ourense feminista, que mellore a calidade de vida dos veciños e veciñas apostando pola calidade urbana superando a vella concepción das cidades como almacéns de coches e un Ourense que defenda os dereitos individuais e colectivos, con participación social e laicismo”.

O BNG leva máis de 30 anos aportando en positivo para Galiza e aportando en positivo para Ourense, concluíu Ana Pontón.

O BNG QUERE SITUAR OURENSE NA SENDA DA MODERNIDADE

Na súa intervención, o candidato do BNG á Alcaldía de Ourense, Luís Seara afirmou que o interese do BNG pasa por converter Ourense “nun concello, vivo, dinámico e de referencia” e por iso eliximos “unha equipa cohesionada e solvente”.

Seara asegurou que a sociedade ourensá é unánime á hora de cualificar de “paralizado e improdutivo” o actual goberno local. Neste contexto, que o PP presente ao mesmo candidato á alcaldía, asegurou, é indicativo de que no PP confunden o verbo ser co verbo estar e para nós, non é o mesmo estar no goberno que ser goberno porque no primeiro caso ocupas unha institución pero no segundo exerces unha responsabilidade, explicou.

Para o candidato nacionalista, o actual goberno foi “irresponsable, arbitrario, insolvente para xestionar e en conxunto deixa peor a cidade do que a atopou”. O BNG non se asusta ante os retos, e hoxe máis que nunca, recalcou “estamos ante un tempo novo e coa convicción de iniciar un novo punto de partida para Ourense”.

Seará insistiu na necesidade dun cambio de rumbo político para “rachar a inercia actual” e ese cambio o dará o BNG con anos de experiencia na oposición e no goberno municipal cun balance de ideas e proxectos que significaron unha verdadeira transformación para o concello. “Temos o aval do noso traballo político noutros concellos convertidos en referentes en Galiza e mesmo fora das nosas fronteiras”. “Nós somos goberno, non só estamos nel” e representamos iniciativa. Ourense non pode permitirse outro mandato como o actual. A candidatura do BNG será “o motor do cambio” que definimos como proxecto das catro ies, “integral, integro, integrador e integrado”. Integral para mellorar a calidade de vida das veciñas e veciños, integro na transparencia e relación coa cidadanía, integrador porque se constrúe dende as persoas como centro e para elas, e integrado cun proxecto de país.

“No BNG somos unha alternativa preparada e con solvencia para facer avanzar Ourense e queremos situalo na senda da modernidade e da prosperidade”.

Antón Sánchez e Xosé Manuel Beiras visitarán a Oriol Junqueras e Raúl Romeva

O encontro terá lugar o vindeiro 10 de decembro na prisión de Lledoners onde os dous dirixentes políticos permanecen en prisión preventiva á espera de xuízo. Un procedemento cuestionado por diferentes entidades defensoras dos dereitos humanos, nun tempo no que vimos como tribunais de Estados da Unión Europea se negaron a executar euro-ordes e a aplicar medidas cautelares polos mesmos actos que xustifican no Estado español medidas de excepción como a prisión preventiva.

Este encontro pretende mostrar a nosa solidariedade esixindo que dirixentes políticos de formacións legais poidan realizar o traballo político nas rúas e nas prazas, e tamén nas institucións nas que foron electos, como é o caso do dirixente de ERC Oriol Junqueras. Entendemos que o feito de que sigan en prisión preventiva é unha mostra máis da deriva autoritaria que atravesa aos poderes do Estado español diante das demandas democráticas postas enriba da mesa por boa parte da sociedade catalá.

Dende Anova Irmandade Nacionalista defendemos que en democracia todos os proxectos políticos poden ser non só defendidos, se non levados á práctica se acadan as maiorías sociais suficientes para facelo. O Estado español debera recoñecer antes ou despois o que fixeron xa Canadá ou Reino Unido: o de entender que os conflitos políticos no século XXI teñen que dirimirse abrindo as urnas, e non poñendo freos á democracia. Imaxes como a das cargas policiais nos colexios electorais nese histórico 1-O forman parte da historia máis negra do Réxime do 78 e son impropias de calquera democracia.

Nese sentido vemos con preocupación determinadas afirmacións dos voceiros da dereita española que non descartan a opción de ilegalizar partidos políticos independentistas. Este tipo de afirmacións evidencian unha concepción cativa da democracia, que non acepta a existencia dun marco de respecto dos nosos dereitos sociais e nacionais e que mesmo pon en perigo dereitos e liberdades civís consagrados no propio ordenamento xurídico vixente.

Entendemos que a mudanza de goberno no Estado español debe abrir un tempo novo no que se atendan as demandas sociais das clases subalternas, ao tempo que se amplía e se mellora a democracia. Debemos empurrar nesa dirección para blindar as conquistas sociais e conseguir un marco de benestar para as maiorías sociais, no que se consiga un marco novo que respecte o dereito a decidir dos pobos.

Propostas para a implementación de novas infraestruturas para o abastecemento e almacenamento da auga na cidade de Vigo

En relación a problemática de abastecemento e almacenamento da auga na cidade de Vigo e contorna, Amigos da Terra ven de presentar ante as diferentes administracións implicadas (Concello de Vigo, Xunta de Galicia y Ministerio para la Transición Ecológica) unha serie de propostas de actuación que consideramos deberían aplicarse antes de expor outras medidas máis complexas, custosas e cun considerable impacto ambiental como transvasamentos ou novos encoros.

Desde Amigos da Terra consideramos que a aplicación das mesmas, cunha estimación prudente dos seus resultados, conseguiríase un aumento na capacidade de auga embalsada e no uso eficiente da mesma que moi probablemente faría innecesaria a medio prazo a construción de novas infraestruturas. Estas propostas poderían aplicarse ademais de maneira inmediata. Outro dato que sometemos a considerar é o aforro de custos económicos e ecolóxicos. Estas medidas resultarían considerablemente máis baratas e sen apenas impacto ambiental relevante e, ademais, de aplicación e resultados inmediatos.

Sobre o sistema de tarifas: Pasar do actual pago por tramos ao pago por consumo real.

Segundo o instituto galego de estatística IGE, o instituto nacional de estatística INE e a Organización de Consumidores e Usuarios (OCU) sinalásese que o sistema de tarifas do servizo de auga na cidade de Vigo é a que máis incentiva ao malgasto da mesma. O propio pleno do Concello de Vigo aprobou, por unanimidade, o cambio de devanditas tarifas para establecer o pago por consumo real. Un cambio de sistema de tarifas, aplicando o que se utiliza na práctica totalidade das cidades, implicaría un sensible aforro de auga, unha auténtica concienciación cidadá, e conseiguintemente un sensible aumento das reservas de auga.

Sobre os encoros de abastecemento: Aumentar a súa capacidade actual.

O principal encoro de subministración de auga a Vigo e o resto de Concellos da súa contorna, Eiras, conta cunha capacidade nominal de almacenamento de 22 hectómetros (21 hectómetros útiles). Sobre esta capacidade nominal establécense as previsións e posibles plans de continxencias, pero ese dato oficial non é o dato real. Eiras acumula máis de trinta anos de achegue de lodos e áridos e materiais de arrastre (especialmente marcados tamén polos procesos erosivos dunha conca fluvial na que os incendios son recorrentes). Recuperar a súa capacidade real de almacenamento, e mesmo incrementala de forma sensible poderá facerse cun dobre procedemento de dragado: das súas marxes desde terra e desde embarcación en toda a superficie da súa conca. Este proceso ten dous inconvenientes perfectamente corrixibles. Por unha banda o dragado inevitablemente produce lodos en suspensión durante os traballos que aumentan a turbidez da auga e dificultan a súa potabilización Afortunadamente a comarca de Vigo conta cunha segunda presa de abastecemento (Zamáns) que, aínda que de menor capacidade, permitiría garantir a subministración ata que os lodos en suspensión de Eiras volvesen sedimentarse. Unha vez completada esta actuación en Eiras podería facerse a mesma neste segundo encoro de Zamáns. O segundo problema consiste en dar un tratamento adecuado e ecoloxicamente responsable aos lodos que se extraerían de ambas as presas. Lamentablemente non se necesita afastarse moito da zona de extracción pois, como sinalabamos, atopámonos en zonas de incendios recorrentes. O curso alto dos ríos Oitavén e Zamáns, e consecuentemente os seus lodos de achegue ás presas, carecen de contaminación química nin compostos orgánicos persistentes en cantidades relevantes. Estes lodos poderían utilizarse como substrato e fertilizante para a rexeneración dos chans incendiados. Con este procedemento obteriamos por tanto o dobre beneficio do aumento de capacidade de auga embalsada e a rexeneración de áreas incendiadas. Un cálculo prudente indicaría que as reservas de auga, con este sinxelo e económico procedemento, poderían aumentar nun 10%, o equivalente a garantir máis dun ano de subministración nas peores condicións de ausencia de precipitacións. Como medida complementaria nun futuro debería priorizarse a posibilidade, de ser necesario, do recrecemento dos encoros existentes.

Sobre a rede de distribución: Programa intensivo de renovación e control de perdas.

O último dato oficial dispoñible cifra nun punto semanal o descenso na cantidade de auga embalsada na presa de Eiras pero desde o Concello de Vigo triplican ese dato oficial asegurando un descenso de entre tres e catro puntos semanais. Si realmente estase conseguindo un aforro significativo no consumo (o Concello cífrao nun 4´5% ) a baixa pluviosidade, aínda que con maiores precipitacións que no mesmo período do ano pasado cando se decretou a prealerta por seca, non explica por si soa este vertixinoso descenso nas reservas. O INE cifra nun 30% a media das perdas de auga derivadas das deficiencias nas redes de distribución. A hemeroteca dispoñible abunda en exemplos recentes de inundacións frecuentes nas rúas da cidade por rotura de tubaxes. Moitas obras de reparación en devanditas redes. Descoñecemos o efecto concreto na porcentaxe de minimización de perda de auga nas redes de distribución, aínda que a maioría porcentual dos fondos destinados a esta renovación das redes destínanse a actuacións complementarias de renovación de beirarrúas, firmes de estradas e sobre todo ornamentación e mobiliario urbano. Consideramos que a prioridade debería ser fundamentalmente a renovación das redes de saneamento (aínda con moitos quilómetros de tubaxes de fibrocemento) e a esa prioridade deberían destinarse os fondos da concesionaria correspondendo o resto de gasto ornamental das actuacións ao Concello.

Sobre as medidas concretas de aforro por parte do Concello: eliminar os baldeos e as fontes ornamentais de ciclo aberto e adoptar outras medidas.

Os propios traballadores da concesionaria da auga de Vigo pedían tomar medidas (xa en plena alerta por seca o pasado outono) para reducir o malgaste que significaba arroxar diariamente 1.500.000 litros de auga. Xa no ano 2009, cun consumo de 1.000.000 de litros diarios entón (en menos dunha década os baldeos incrementaron en 500.000 litros de auga o seu consumo) solicitaban polo menos evitalos en caso de choivas torrenciais. Consideramos que os baldeos nas rúas son incompatibles cun consumo responsable da auga. Non se trata só de reducilos en situación de prealerta por seca ou suspendelos en situación de alerta, máxime cando os mesmos realízanse con auga potabilizada e clorada da rede de abastecemento para o consumo humano. Existen alternativas suficientes (auga procedente da estación depuradora, tanques de tormenta de almacenamento etc) que se podería destinar a esa finalidade. As billas de auga para baldeo deberían substituírse polos modelos que incrementan a presión de saída reducindo o consumo. Os sistemas de rega manual e automatizado dos xardíns urbanos debe programarse de forma eficiente, evitando a rega de xardíns nas horas centrais do día (especialmente nas xornadas de máis calor) que implica un desperdicio do 40% da auga utilizada. A instalación por parte do Concello de Vigo de fontes ornamentais na cidade aumentou considerablemente estes últimos anos sexan de ciclo aberto ou pechado (e moi especialmente no primeiro caso) consideramos incompatible cun consumo responsable da auga seguir engadindo estes elementos ornamentais á decoración urbana. Como mínimo as fontes ornamentais de ciclo aberto deberían ser desconectadas da rede de subministración. Paralelamente todas as instalacións públicas deberían contar con sistemas eficientes de aforro de auga (perlizadores nas billas e todos eles con temporizador, cisternas de dobre descarga).

Sobre actuar contra as causas e non só nos efectos: Medidas exemplares contra o cambio climático

O Concello de Vigo e o seu alcalde, que presidiu durante anos a Rede Española de Cidades polo Clima e que mesmo acolleu algunhas das reunións da mesma coñece perfectamente que a seca é un dos efectos do cambio climático, e coñece igualmente cales son as súas causas. O Concello de Vigo debería ser exemplar tamén na loita contra as causas. E así chegamos ás luces do Nadal. Afirma o alcalde de Vigo que o consumo da iluminación ornamental será irrelevante aínda que este anuncio coincide coa noticia do prezo da electricidade en máximos históricos. Facer o cálculo do prezo quilowatt/hora multiplicado por ese nove millóns de luces é sinxelo (e a cantidade non é precisamente pequena) pero para o tema que nos ocupa aplicaremos outro indicador: a súa incidencia no cambio climático, porqué este indicador? Porque aquí chegamos á relación que diciamos ao principio: o cambio climático é o argumento de fondo que desde o Concello utilízase para esixir medidas contra a seca. Entre o 40% e 65% da electricidade que consumimos en Vigo, e a porcentaxe aumenta precisamente en función da seca, procede das centrais térmicas de carbón segundo despréndese do informe de oficio realizado pola oficina do valedor do cidadán do Concello de Vigo e a Universidade de Vigo, as maiores responsables a nivel autonómico da emisión de gases de invernadoiro que provocan ese cambio climático do que uno dos seus efectos, é xustamente a seca. O malgasto enerxético derivado deste tipo de actuacións (sumadas ao resto de contribucións de Vigo á emisión directa e indirecta de gases de invernadoiro) contribuirá sensiblemente a incrementar as causas do problema que simultaneamente pretendemos mitigar, nos seus efectos con medidas de urxencia.

Caudal ecolóxico do río Oitavén: Revisión á alza.

O río Oitavén, que abastece a presa de Eiras, conserva aínda, a pesar da construción no seu día de dita presa, uns valores ecolóxicos relevantes e en moitos casos únicos no contexto fluvial da Provincia. O seu caudal ecolóxico efectivamente debería ser analizado para a súa actualización engadindo o factor climático e a súa incidencia na menor pluviosidade. Concretamente, ao contrario do que propón o Concello de Vigo, desde Amigos da Terra consideramos que devandito caudal ecolóxico debería revisarse á alza, nunca diminuírse.

Eu tamén podo facer Galiza

Iria Bouzas

Chámome Iria Bouzas, son de Vigo pero obrigada pola necesidade, fai 14 anos que vivo en Madrid.

Levo toda a vida tentando defender o galego e con él, defender Galiza que é unha das cousas que máis quero na vida. Desgraciadamente levo toda a vida a facer esa defensa en perfecto español.

Teño a inmensa sorte de estar rodeada de xente que, inda que as veces teñan que ter moitísima paciencia coa vea terca que herdei do meu avó, adican parte do seu tempo a facerme pensar.

Dándolle voltas á cabeza cheguei a unha conclusión que non me deixou nada contenta con min mesma: ¡Son unha hipócrita!

Levo anos poñendo a escusa da distancia para non facer nación da única forma que eu podo facela, escribindo en galego.

Galiza leva séculos agonizante. A nosa Terra, o noso país está a morrer, e moitos de nós miramos para ela pedíndolle que resista sen facer nada por darlle osíxeno.

Vivir fora da Galiza nunca foi impedimento para ningún galego para poder seguir facendo país. Os emigrantes mantiveron os nosos costumes, a nosa lingua e a nosa cultura vivos, simplemente vivindo aferrados a eles.

O pai do galeguismo, Castelao, transformou a súa dor por estar lonxe da súa patria no noso combustible para loitar por ela.

E eu, Iria Bouzas unha galega de Vigo que vive físcamente lonxe pero co corazón posto na nosa casa, non quero seguir sendo unha hipócrita.

Ben sei que non vou escribir obras maestras en galego, terei que loitar en cada palabra que escriba contra o esquecemento e mesmo vou ter que quitarlle o po os meus libros de gramática e darlles un bo repaso.

As editoriais de libros en galego xa me teñen como clienta pero agora van verme casi como a unha amiga. Teño o propósito de ler en galego ate que o erguerme polas mañás o meu primer pensamento sexa na miña lingua nai.

Sei que vou ter que apretar as mans ao decatarme de que publico algunhas cousas con algunhas faltas de ortografía e que terei que tomar un Almax cando lle dea algunha patada a nosa gramática.

Pero vou avisando de que non pensó pedir perdón. Tentarei mellorar con todalas miñas forzas pero vou publicar todo o que me deixen no idioma no que choro, o galego.

Podenme criticar. A partir de agora, cando escriba en galego non estarei a facer periodismo. Tampouco estarei a facer literatura. Estarei ocupada facendo algo moito máis importante,

¡Dende agora, eu Iria Bouzas, estou a facer Galiza!

¿Axudadesme?

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies